එදා මෙදාතුර .........

මතකද ඔබ.. මා.....

2012-01-17T18:45:00.001+05:30

1996 හෝ 97 එක්තරා දිනක සවස 7.30 ට පමණ රොටරියේ දෙයියගේ පන්තිය නිමාවී, කොහුවල හංදියට පයින් ගාටන අතර සිදු වූ සිදුවීමක් ඊයේ රාත්‍රියේ එෆ් එම් චැනලයක ගිය ගීතයක් නිසා නැවතත් මතකයට ආවේ කාලයක් තිස්සේ දියයට ඔබා ගෙන සිටි රබර් බෝලයක් මෙනි. එදා වැසි දිනයක් වූ අතර අපේ සෙට් එකටම තිබුනේ කුඩ දෙකක් හෝ තුනක් පමණකි. ඉතින් මගේ කුඩය යටින් හතර දෙනෙකු පමන යමින් සිටින අතර අපේ එකෙක් ‍"ඒයි ..... අන්න උඹේ ලව් එකත් යනවා තනියම කුඩේක. උඹෙ කුඩේ අපිට දීලා තෝ පල ඒකට" කියා මා වැස්සට තල්ලු කලා මදිවට ඇයටද කතා කලේය.(ලව් එක කිව්වට ඇත්තටම ට්‍රයි එකක්)

ආ.. ඇයි තෙමෙන්නෙ එන්න **** මේකට කියා ඇයද පැවසූ බැවින් එදා නුගේගොඩ සිට කොහුවලට ඇය සමග එකම කුඩය යටින් එන්නට අවස්ථාව ලදිම. මේ ගීතයේ පැවසෙන පරිදිම ගෑවී නොගෑවීය. පසු කලෙක අප දෙදෙනා කලක් පෙම්වතුන් වූවද අවසන මතකයන් පමණක් ඉතිරි කර ගනිමින් අපි වෙන් වුනෙමු. ඇත්තටම පෙම්වතුන් සේ එකම කුඩයක් යටින් යනවාට වඩා අමුතුම තෘප්තිකර හැඟීමක් තමන් හිතින් ආදරය කරන කෙනෙකු සමග යනවිට දැනෙන බව නම් සැබෑය.

එක කුඩයක් යට ගෑවි නොගෑවී
දවසක් හැන්දෑවේ . . .
මතකද ඔබ මා පියවර මැන්නා
පිනිමල් වරුසාවේ . . .

කිසිවකු සමඟින් එකට තුරුළු වී
ඉර බැස යන වේලේ . . .
ඔබ යනු දුටුවිට මතකය රිදවයි
අපෙ ඉස්සර කාලේ අපේ ඉස්සර කාලේ

මඳ අව් රස්නෙට වුව සෙවනක් නැත
ඔබහට අද දවසේ . . .
වැස්සට අව්වට තනිව මුහුන දෙමි
මගේ මහිම එලෙසේ මගේ මහිම එලෙසේ . . .

2012 සුභ අලුත් අවුරුද්දක් වේවා..

2011-12-31T15:32:00.003+05:30

අවුරුද්දකටත් වැඩි කාලයක් අතෑරල දාල තිබුනු බ්ලොග් ලියවිල්ල 2012 අවුරුද්දෙ ඉදන් ආයෙත් පටන් ගන්න තමයි හිතාගෙන ඉන්නෙ. පහුගිය කාලෙ මූන දෙන්න වුනු ජීවිතේ නොයෙකුත් හැල හැප්පීම් එක්ක බලොග් ලියන්න තරම් නිදහස් මානසික තත්වයක් තිබුනේ නැති එක තමයි නිහඬතාවයට හේතුව. මම නොලිව්වනොට අනිත් අය ලියන දේවල් නම් සෑහෙන දුරට කියෙව්වා. මම ලියන්න පටන් ගත්ත කාලෙට වඩා සෑහෙන බ්ලොග් ප්‍රමාණයක් දැන් ලියවෙනවා වගේම ඒ දවස් වල ලියවුනු මම ආසාවෙන් කියවපු බ්ලොග් වලින් දුකා ගෙ බ්ලොග් එක විතරයි ඉඳල හිටලවත් සින්ඩියෙ තියෙන්නෙ. 2012 දි නැවතත් පරණ බලොග් අලුතෙන් ලියවෙයි කියල මම හිතනව.

එහෙනම් එදා මෙදාතුර ජීවිත අද්දැකීම් සමග 2012දි හමුවෙන බලාපොරොත්තුවෙන් හැමෝටම 2012 සුභ වේවා කියල ප්‍රාර්ථනා කරනව.

මේ ආදරයද.........?

2010-10-24T20:27:00.002+05:30

..........................?

2010-09-09T22:52:00.001+05:30

මම වැරදිද.....?

2010-06-28T22:30:00.004+05:30

ආදරය කියන්නෙ පරිත්‍යාගයක්, කෙනෙක් තවත් කෙනෙකුගේ සතුට වෙනුවෙන් කරන කැපකිරීමක් වගේ නොයෙකුත් අර්ථ දැක්වීම් ආදරයට දෙන්න පුලුවන්. නමුත් ඇත්තටම ආදරේ කරනවා කියන්නෙ කුමක්ද? මේ මගේ හිතේ සෑහෙන කාලයක් තිස්සෙ වද දෙන ප්‍රශ්නයක්. මගේ පැරණි ලිපියකට ප්‍රතිචාරයක් ලෙස අපේ පිස්සා ද ඇතුලුව කීප දෙනෙකුම මට කියා ඇති දෙයක් තමයි උඹ හරියට ආදරේ කරල නෑ කියන එක. මේක අද ලියන්න හිතුනෙ අදත් මගේ කාර්යාලයේ හිතවතියක් මේ කතාවම කියපු නිසයි.

මේකයි කතාව

ඇය - ‍ඔයාට ගර්ල් ෆ්‍රෙන්ඩ් කෙනෙක් ඉඳලම නැද්ද ?

මම - හිටියා

ඇය - ඉතින් මොකද උනේ?

මම - එයාගෙ අම්මලාට එයාව ඉක්මනට බන්දලා දෙන්න ඕන උනා. අපේ ගෙදරිනුත් ප්‍රශ්න තිබුන නිසා මම එයාව අතැරියා.......

ඇය - ඔයා ඇත්තටම ආදරේ කරන්න නැතුව ඇති නැත්නම් කොහොමද එකපාරටම අමතක කරන්නෙ?

මම එතනින් එහාට උත්තර දෙන්න ගියේ නෑ. මොකද එහෙම උනා නම් දිග කතාවක් කියන්න වෙන නිසා. නමුත් හැමෝටම ප්‍රශ්නයක් වෙලා තියෙන දේට අද උත්තරයක් දෙන්න හිතුනා. මේ පිලිබඳව ඉතා කුඩා සටහනක් කලකට පෙර පලවූ බ්ලොග් ලිපියක ප්‍රතිචාරයක් ලෙස පල කල අතර මේ ලිපියෙ එන ඇතැම් දේ මම කෙනෙකුට කියන පලමු වෙනි වතාව මෙය වේ. මම දන්න විදියට මම ඇයව අතෑරීමට හේතුව ඇයවත් දන්නෙ නෑ. ඒක නිසා ඇය අදටත් මට වෛර කරනවා ඇති ඇයව රැවටුවා යයි සිතාගෙන.ඒ කාලයේ මා සමග එකම කාර්යාලයේ සේවය කල ඇගේත් මගේත් සම්බන්ධයට ඇගේ දෙමාපියන්ගේ කැමැත්ත ඉතා අසීරුවෙන් ලබා ගත්තත් මාගේ දෙමාපියන් එතරම් ඉක්මනින් කැමති කරවා ගත නොහැකි විය. ඒ අතරම ඇගේ දෙමාපියන් හට ඇයව කා හට හෝ ඉක්මනින් විවාහ කර දී ඇගෙන් නිදහස් වීමට අවශ්‍ය වුනු අතර ඊට ප්‍රධානම බාධාව මා විය. මේ කාලයේදී මා රැකියාවෙන්ද ඉවත්ව සිටි අතර මාගේ දෙමාපියන්ගේ කැමැත්ත මත හෝ ඇයව විවාහ කර ගැනීමට තරම් මානසිකත්වයක්ද මා හට නොවීය. මේ අතරතුර කාලයේදීම සිදුවූ මාගේ සොයුරියගේ විවාහයත් එම විවාහය දෙමාපියන්ගේ අකැමැත්ත මත සිදුවීමත් හේතුවෙන් තවත් පැත්තකින් මා හට දෙමාපියන් ගැන තිබූ වගකීම ද දෙගුන තෙගුන විය. මේ කාලය තුල ඇයට ඇයගේ දෙමාපියන් ගෙන ආ විවාහ යෝජනා සහ විවාහ වීම සඳහා ඇයගේ නිවසින් එල්ලවන දැවැන්ත පීඩනයත් මා කෙරෙහි ඇති ආදරයත් අතර ඇය ගිරයට අහු වූ පුවක් ගෙඩියක් මෙන් දුක් විඳින්නට විය. තම දරුවන් වෙනුවෙන් තම ජිවිතයේ සුන්දරම කාලය කැප කල මාපිය යුවලකගේ එක් දරුවෙක් ඔවුන්ගේ සිහින බිඳ දැමු පසු මටත් මාගේ සතුට වෙනුවෙන් ඔවුන්ගේ සිත් බිඳවිය හැකිද?? එසේම හිමි වේ යැයි කිසිසේත්ම සිතා ගත නොහැකි දෙමාපියන්ගේ ආශීර්වාදය කවදා හෝ ලැබෙන තුරු ඇයට විඳවමින් හිඳින්නට අරින්නද?

මා දන්නා තරමින් මා ඇයව අතැර ටික කලකින්ම ඇය කිසිවකු සමග විවාහ වී මේ වන විට දරුවන්ද ලබා සාර්ථක යුග දිවියක් ගත කරයි. ඇත්තටම මා ඇයව අතෑරීම තුලින් මා බලාපොරොත්තු වූ ඇයගේ සතුට ඇයට දැන් ලැබී ඇත. විවාහයත් සමග දෙමාපියන් හා විරසක වු මාගේ සොයුරියටද දැන් දෙමාපිය ආශීර්වාදය ලැබී ඇත. කාලයත් සමගම ඔත්පලව තිබූ මා දෙමාපියන්ගේ සිත් ද දැන් නිට්ටාවටම සුවපත් වූ බවක් පෙනේ. ඉතින් මා ඒ අවස්ථාවේ ගත් තීරණය වැරදිද? මම ඇත්තටම ආදරේ කරලා නැද්ද??? ඇයි මගෙන් මේ ප්‍රශ්නෙ අහන අය උඹ එයාව අතැරියද නැත්නම් අමතක කලාද කියල නාහන්නෙ? එහෙම ඇහුවොත් මට බය නැතුව දෙන්න උත්තරයක් තියෙනවා. ඒ තමයි මම ඇයව අතැරියාට ඇය තාමත් මගේ මතකයේ සිටින බව.......

නිරතුරු මම ඔබ ගැනම සිතන්නෙමි.........!

2010-06-07T06:01:00.000+05:30

නිරතුරු මම ඔබ ගැනම සිතන්නෙමි

එනමුදු එය වරදක් බව දන්නෙමි

පෙම් නොකරන්නට සිතුවද ඔබ වෙත

සෙනෙහස ලියලයි නොදැනිම හද මැද

මදහස දුන්නද දකින වෙලේ

ඔබ මෙහි එන බව සිතිය නොහේ

කලයුතු කිසිවක් හිතට නොයේ

මගෙ සිතිවිලි එක තැනක නොවේ

නිරතුරු මම ඔබ ....../

දෙදනා සැනසුම ලැබිය යුතුයි

දිවි ඇති තුරු ලඟ සිටිය යුතුයි

අප එක සෙවනක විසිය යුතුයි

නැත නැත අප එක් නොවිය යුතුයි

නිරතුරු මම ඔබ ....../

පැරණි ගීත වලට ආස කරන අයට නම් මේ සිංදුව මතක ඇති. මිල්ටන් මල්ලවආරච්චිගෙ මම ආසම හදවතට දැනෙ‍න ගීත වලින් එකක්.

මෙතනින් බාගෙන අහන්න

මේ දවස් වල ජීවිතේ

2010-05-30T20:49:00.002+05:30

මේ දවස් වල ජීවිතේ නම් හරිම විවිධාකාරයි. පහුගිය අවුරුදු හතරක විතර කාලයක් ගත කරපු ඒකාකාර ජීවිතය මේ වෙනකොට සෑහෙන වෙනසකට ලක් වෙලා කියල මට දැනෙනවා. නමුත් ඒ වෙනසට හේතුවත් පහුගිය අවුරුදු හතරම කියලත් මට හිතෙනවා.

2010 අවුරුද්ද ආරම්භයත් සමගම මගේ රැකියා ජීවිතයේ ගන්ධබ්භ කාලයක් ඒ කියන්නෙ සේවාස්ථ පුහුණු කාලයක් ආරම්භ උනා. නමුත් ඒ සඳහා මා නුවර ශාඛාවට අනුයුක්ත කල බැවින් ගම රට අතැර යන්නත් වුනා. දැන් වැඩිය බලොග් එක පැත්තෙ එවෙන්නෙ නැත්තෙත් ඒකයි. සතියකට සැරයක් ගෙදර ආපු වෙලාවට ඉඩක් තිබුනොත් මොනවා හරි කුරුටු ගාල යනවා ඇරෙන්න ඉස්සර වගේ මේකටම වෙලා ඉන්න අවස්ථාවක් නැහැ දැන්. වෙලාව තිබුනත් සතියක් තිස්සෙ මම එනකම් තනියම ගෙදර ඉන්න අම්මත් එක්ක වචනයක් කතා නොකර කොම්පීතරේ අල්ලගත්තොත් ඒක කොච්චර අසාධාරණද?

නුවර ජීවිතේ නම් වරදක් නැහැ. ඒත් හවස් වෙනකොට තමයි එපා වෙන්නෙ. සේවය නිමවෙලා නවාතැනට ගියාම හිතට දැනෙන්නෙ මහා පාලු මූසල කම්මැලි කමක්. තනි කමක්. දුරකතනය තිබුනට මගේ තනිකම නැති කරගන්න හැමදාම යාලුවන්ට කතා කරල ඒ අයට වදයක් වෙන්නත් බෑනෙ. මුලින් මුලින් හවසට ගන්නොරුව සිට පේරාදෙනියටත් නැවත පේරාදෙනියේ සිට ගන්නොරුවටත් ඇවිදිමට පුරුදුව සිටියත් වැස්ස පටන් ගත්තට පස්සේ ඒකත් නැවතුනා.

මේ දවස් වල නම් ටිකක් වැඩිපුර නිවාඩු තියෙනවා. හැම අවුරුද්දකම වගේ මේ කාලය සංචාරක ව්‍යාපාරයේ off season එක නිසා මේ දවස් වල අපිට අවස් තුනක් වැඩ කලාම දවස් තුනක් නිවාඩු ලැබෙනවා. එහෙම කරන්නෙ මේ කාලෙට ආයතනයේ වියදම අඩු කර ගන්නයි. මට ඉතින් දවස් තුනෙන් තුනට කොළඹ එන්නයි නුවර යන්නයි බැරි නිසා දවස් පහක් වැඩ කරල දවස් පහක් නිවාඩු ගන්නවා. අදින් මගේ දවස් පහක එක නිවාඩුවක් ඉවරයි. දැන් නම් හෙට උදේ යන්න තියෙනව කියල හිතනකොටත් හරි කම්මැලියි.

නිවාඩු දවස් ටිකේ බ්ලොග් එකේ මොනව හරි ලියන්න කියල හිතනකොට මාස ගානක් තිස්සෙ ලියවෙන්නෙ නැතුව හිතේ හිරවෙලා හිටපු වචන එකකට එකක් යටකරගෙන එලියට පනින්න හදන නිසා කිසිම දෙයක් හරියට ලියා ගන්න බැහැ. දැන් මම තීරණයක් ගත්තා හිතේ තියෙන දේවල් දින පොතක ලියන්න. එතකොට වෙලාව තියෙන විදියට ඒවා බ්ලොග් එකට පිටපත් කරන්න පුලුවන්නෙ.

ඔබ මට හිමි නෑ.......

2010-05-17T18:45:00.003+05:30

අපට අප අහිමි බව

දනිමු අප දෙදෙනාම

ඒත් ඇයි වෙන්වන්න

මැලි කමක් මේ තරම්

කඳුලැලි සඟවා අප දෙනෙතේ

අන්සතු වෙමු අපි මේ භවයේ

බාධක දුරලූ ලොවක දකින්නට

පෙරුම් පුරමු මතු උපදින භවයේ

ඉස්සර බැඳි පෙම...

2010-04-28T18:49:00.001+05:30

නුඹ වෙනුවෙන් මම.........

2010-03-06T21:10:00.001+05:30

මා ගිලගත් හුදකලාව.........

2010-02-17T21:10:00.000+05:30

මුළු හදින් මම ඇයට පෙම් කොට............

2010-02-02T20:15:00.000+05:30

මා රසවිඳ ඇති බොහොමයක් ගීත වලට බොහෝවිට පදනම් වෙලා තියෙන්නෙ ඒ ඒ ගීත රචකයන්ගේම පෞද්ගලික ජීවිත අද්දැකීම්. මේ ගීතයත් එහෙමමයි. හැමදාම හවසට තමන්ව මුණගැසීමට පැමිණෙන තම පෙම්වතිය එක් දිනක් නොපැමිණීම නිසා තමයි රචකයා අතින් මේ ගීය ලියවිලා තියෙන්නෙ. ඔහු නමින් ආරියදාස එඩ්මන්ඩ් පෙරේරා ජයසූරිය. අනුරාධපුරයේ හිටපු දිසාපතිවරයෙක්. මේ රචකයා අතින් ලියවුනු එකම ගීතය මෙය වීම සහ මෙය ගායනා කරන නාරද දිසාසේකරයන් සහ ගීත රචකයා එකම පන්තියක අධ්‍යාපනය ලැබූ මිතුරන් වීම මේ ගීතයේ තවත් විශේෂත්වයකි.

එක දවසක් දකින්නෙ නැතුව මෙහෙම ගීතයක් ලියවුනා නම් ඔහු ඇයට කොච්චර ආදරය කරන්නට ඇත්ද? ගීතයෙ එහෙම ලියවිලා තිබුනට ඇත්ත ජීවිතේදි නම් ඔවුන් දෙන්නා විවාහ වෙලා තියෙනවා. වැඩි විස්තර මෙතනින් බලන්න.

කලකට පස්සේ........

2010-01-29T21:50:00.000+05:30

හෆ්ෆා...... ගිය සිකුරාදා(22) ඉදන්ම කියවලත් තවම මේ බ්ලොග් ටික කියවල ඉවර කර ගන්න බැරි උනානෙ. සති දෙකකට පස්සෙ ගිය සිකුරාදා තමයි ගෙදර ආවෙ. ආ කියන්න අමතක උනා මම දැන් වැඩ කරන්නෙ නුවරනෙ. කොළඹදි වගේ නෙවෙයි එහෙදි බ්ලොග් කියවන්න වෙලාවකුත් නෑ. තිබුනත් මම පරිගනක අංශයෙන් ඉවත් උනු නිසා කොම්පීතරේකුත් නෑ මටම කියලා.කාලෙකින් මේ පැත්තේ ආවෙ නැති නිසයි පොඩි සටහනක් දාල යන්න ආවෙ. එහෙනම් මම යනවා ආයෙත් බලොග් ටික කියවන්න. ඉඩක් ලැබුනු ගමන් අලුත් දෙයක් ලියන්නම්.

සිංහලයේ අවසන් රජ මාළිගය

2010-01-03T21:38:00.002+05:30

ශ්‍රී දළදා මාලිගාව, සිංහලයේ අවසන් රජතුමා වූ ශ්‍රී වික්‍රම රාජසිංහ රජතුමාගේ මාලිගය ලෙසට වැරදි මතයක් අප බෙහෝ දෙනෙකු තුල ඇත.ඉහත රූපයේ දක්වා ඇත්තේ 1815 දී සුද්දන් විසින් ගිනිබත් කරන ලදුව පසු කාලීනව සංරක්ෂනය කරන ලද නියම රජ මාලිගයයි.

පසුගිය දිනෙක නුවර ගිය විටෙක මීට අවුරුදු විස්සකට පමණ පෙර පාසැල් අධ්‍යාපන චාරිකාවකදී මේ මාලිගය නැරඹීමට ගිය මතකය නැවත අලුත් උනා. මෙය පිහිටා තිබෙන්නේ ශ්‍රී දළදා මාලිගාවට වම් පසින් රාජා ඇතාගේ කෞතුකාගාරයට යාබදවයි. නමුත් ආරක්ෂක හේතූන් නිසා ඒ පැත්තෙන් මෙයට ඇතුලු විය නොහැක. මෙහි පිවිසීමට නම් නාථ දේවාල භූමිය මැදින් ඇති මාර්ගයේ ගමන් කල යුතුය.

මෙහි පිවිස අරමුණක් නැතිව ඒ මේ අත ඇවිදිමින් සිටි මට එහි සිටි අපූරු පුද්ගලයෙක් මුණ ගැසුනි. ඔහු පුරා විද්‍යා දෙපාර්තමේන්තුවට අනුබද්ධිතව මෙහි සේවයේ යොදවා ඇති නිලධාරි මහතෙකි. රජ කතා වල පමණක් අසා තිබුනු සීමැදුරු කවුළුව, රජ කාලයේ භාවිතා වූ වායු සමීකරණයක් (මෙය විශාල අවානක් වැනි දෙයකි) වැනි ඉතා වටිනා පුරා වස්තු රාශියක් ඔහු විසින් මා හට පෙන්වා දී ඒ පිලිබදව ඉතා ගැඹුරු විස්තරයක්ද ලබා දුන්නේය. ඔහු පැවසූ පරිදි සුද්දන් මෙය ගිනිලන්නට පෙර මෙහි මහල් තුනක් තිබී ඇත. නමුත් ගින්නෙන් විනාශ නොවී ඉතිරිව ඇත්තේ මේ කොටස පමණය.

ඔහු පැවසූ ආකාරයට දළදා මාලිගාව වැඳ පුදා ගැනීමට පැමිනෙන මහා ජනකායෙන් සියයට එකක්වත් දෙනා මේ මාලිගය නැරඹීමට නොපැමිනේ. මා ගිය දිනයේත් දළදා මාලිගාව තුල ඇඟිල්ලක් ගැහීමටවත් ඉඩක් නොමැති වුවත් එදා දවසටම මෙම මාලිගය වෙත පැමිණ ඇත්තේ මා පමනකි. එය එක්තරා ආකාරයක මගේ වාසනාවකි. මා හට මුන ගැසුනු පුද්ගලයා සමග නිදහසේ දොඩමළු වී ඉතා වැදගත් කරුණු රාශියක් දැනකියා ගැනීමට හැකි වූයේ ඒ නිසාය.

2010 - අලුත් ගමනක ආරම්භයක්

2009-12-29T20:50:00.003+05:30

හැම අවුරුද්දෙම අන්තිමට කරනව වගේ අදත් මගෙ කාර්යාලයෙ මගේ වැයික්කිය අස්පස් කරන්න පටන් ගත්තා. ඒත් පොඩි වෙනසක් තියෙනව කලින් අවුරුදු වලට වඩා. වෙනදට මම අස්පස් කරන මේසේ පුටුව කබඩ් ලිපිගොණු සේරම ජනවාරි පලවෙනිදට මාව පිලිගන්න බලන් ඉන්නවා. ඒත් ලබන ජනවාරි පලවෙනිදට ඒවා වෙනත් කෙනෙකුට භාර දෙන්න වෙනවා කියල තාමත් මගෙ හිත පිලිගන්නෙ නෑ. ආයතනයෙන් වෙන් නොවුනත් පුරුදු රස්සාව දාල යන්න වෙනව කියල හිතන කොටත් මහා දුක් මුසු හැඟීමක් හිතට එනවා. කලින් ලිපියකත් මම ඉඟි කරල තිබුන පිම්ම පනින්නයි මේ අස්පස් කරල සූදානම් වෙන්නෙ. පහු ගිය දවස් ටිකේ මගේ රාජකාරි භාරගන්න ආපු කෙනාව පුරුදු පුහුණු කරන එකටම කාලෙ ගතවුනා. හැම දේටම වඩා දුක හිතෙන්නෙ කවදාවත් රස්සාවකට පිට රට යන්නෙ නෑ කියල හිතාගෙන අතටම ආපු අවස්ථාත් බොහොමයක් අතෑරපු මම මේ සූදානම් වෙන්නෙ ලංකාව දාල යන්න කියල හිතන කොට තමයි. අලුත් තැනැත්තාව පුහුණු කරලාට පස්සෙ මගේ පුහුණු කාලය ආරම්භ වෙනවා. ඒ අපේ ආයතනයේම නුවර ශාඛාවට අනුබද්ධිතව. පුහුණුව අතර තුර අන්තර්ජාලයට පිවිසීම බොහෝම සීමා සහිත වෙයි. පුහුණුවෙන් පස්සෙ විදේශ රටක පිහිටි ආයතනයේම ශාඛා ජාලයසම්බන්ධව පත්වීම භාර ගන්න වෙනවා ලබන අවුරුද්දෙ මැද භාගය වෙන කොට. මෙතෙක් කල් මා රාජකාරී කල විෂය ක්ෂ්‍රේත්‍රයෙන් සම්පූර්ණයෙන්ම පරිභාහිර විෂය ක්ෂ්‍රේත්‍රයකට සම්බන්ධව මට උසස්වීමක් ලැබීම තමයි මේ සේරටම හේතුව. කොහොම උනත් මා ගැන ආයතනය තැබූ විශ්වාසය බිඳක්වත් පලුදු නොකර ලැබෙන රාජකාරිය අකුරටම ඉටු කිරීමට තමයි හිතාගෙන ඉන්නෙ.

ඉතින් අපි අලුත් අවුරුද්දක අලුත් විදියට ආයෙත් මුනගැහෙමු. එතෙක් ලබන්නා වූ 2010 අවුරුද්ද සියලු දෙනාටම සියලු සිතුම් පැතුම් ඉටු වන සුභම සුභ අලුත් අවුරුද්දක්ම වේවා...........

මාත් ඔහොම ගිය හැටි මතකයි..........

2009-12-26T21:12:00.003+05:30

"අර කෙල්ලගෙ බෙල්ල හිර වෙලා මැරෙනව අර තුරුලු කරන් යන විදියට.."

"ආ... දැන්ද ඒක තේරෙන්නෙ.. ඒ කාලෙ මාව තුරුල් කරන් යන කොටත් දැකපු මිනිස්සු ඔය විදියටම කියන්න ඇති..."

මේ මගේ මිතුරෙකුත් ඔහුගේ බිරිඳත් අතර පේරාදෙණිය මල් වත්තේදී මා ඉදිරිපිට ඇතිවූ දෙබසක්. මෙය ඇසීමත් සමග මාව ගොලු වෙලා පාසැල් කාලය වෙත මතකය දිව ගියේ නොදැනිම වගේ. මේ මිතුරාත් මාත් දෙදෙනාම පෙම්වතියන් සමග පේරාදෙණිය මල් වත්තට ආ ගමනත් ඇතුලුව සොඳුරු මතක රැසක් මා ඉදිරිපිට මැවුනේ චිත්‍රපටයක රූපරාමු පෙලක් මෙනි. ඇත්තටම අපටත් ඒ කාලෙ මිනිස්සු එහෙම කියන්න ඇති නේද?

ඒ උසස් පෙල කරන කාලයේ ගියාට පසු මාත් මිතුරාත් මල් වත්තට ආ පලමු අවස්ථාව මෙය වීමත් ඔහුට ඇය හා විවාහ වී ඔවුන්ගේ දියණිය සමගත් එදා පෙම්වතිය සමග එහි ගිය මා අද තනිවමත් පැමිනීම දෛවයේ සරදමක්ද කියලත් හිතුන කීප වරක්ම. ඒ වගේම මගේ හිතට ආපු දෙයක් තමයි අද මම මේ දකින කුරුළු ජෝඩු වලින් කී දෙනෙක් එකට කූඩු වෙන්න වාසනාව ලබයිද, කී දෙනෙක් මම වගේ තනි වෙයිද කියන එක.

ආදරය කියන්නෙ හරිම පුදුමාකාර දෙයක්. මිනිස්සු වෙනස් වුනාට කාලය වෙනස් වුනාට ආදරය හැමදාම එක වගේ කියල මට හිතෙනව.

මේ සියලුම සිදුවීම් අස්සෙ අමරදේව ශූරීන්ගෙ ගීයක කොටසක් තොලග මිමිනෙන්න පටන් ගත්තෙ නිකම්ම වගේ...

" සිරි පොද වැස්සේ එකම කුඩය යට ...

තෙරපි තෙරපි අර යුවලක් යන හැඩ.....

මාත් ඔහොම ගිය හැටි මතකයි..

මට හොඳ හැටි මතකයි........."

මා හට දී ඔයා ඈ සුර ලොව ගියා

2009-12-15T12:10:00.002+05:30

අපේ ගෙවල් කිට්ටුව හිටපු මගේ වයසෙම යෙහෙලියක් මීට අවුරුදු කීපයකට පෙර මියගියා යම්කිසි රෝගයක් නිසා. ඒවෙනකොට එයාට මාස කීපයක් වයස දරු පැටියෙකුත් හිටියා. ඊට පස්සෙ ඇයගෙ සැමියා මේ දරුවත් එක්ක තනියෙම ජීවත් වුනා. අපි හැමෝටම කලයත් එක්ක ඒකත් තවත් එක සිදුවීමක් පමණක්ම වුනා. දැන් මේ දරුව ටිකක් ලොකුයි. පෙර පාසැල් යන්නත් පටන් අරන්. හැමදාම උදේට තාත්තත් එක්ක අහිංසක විදියට ඉස්කෝලෙට යන මේ දරුවව දකින හැම වෙලාවෙම මේ ගීතය මගේ මතකෙට එනවා. මේක ගායනා කරල තියෙන්නෙ කේ. සේන කියල ගායකයෙක්. මගේ හිතට වැදුනු සංවේදීම ගීත වලින් එකක් තමයි මේ.

තව ටිකක් කල් දෙන්න..

2009-12-09T09:00:00.002+05:30

ඇත්තටම ලිනකස් වල වෛරස් නැත්ද?

2009-12-07T20:12:00.002+05:30

මට මේක ලියන්න හිතුනෙ e-Asia 2009 බලන්න ගිය වෙලාවෙ දැකපු (අහපු) දෙයක් නිසා. e-Asia 2009 ගැන නම් ලියන්න දෙයක් නෑ. ගියපු අය දන්නව ඇතිනෙ. මේකයි කතාව. ප්‍රදර්ශනේ බලාගෙන බලාගෙන ගිහින් මමත් මගේ මිතුරාත් ලිනක්ස් වලට සම්බන්ධ කුටියක් අසල නැවතුනේ අළුත් යමක් තියෙයි කියල හිතාගෙනයි. ඇත්තටම අළුත් දෙයක් තිබුනා. තෙල් බේත් කාරයෙක් ලිනක්ස් විකුණනවා. සමහරු පැන පැන CD ගන්නවා. internet එකෙන් නිකම් ගෙදරට එවන එක මුන් විකුණනවා කියලත් සමහරු කතා වෙනව ඇහුනා. ඒත් ඒ විකුණපු එකට මම මොකුත් කියන්නෙ නැහැ. මොකද ඔවුන් ලිනක්ස් CD එක විකුණුවෙ Training CD එකක් එක්ක. ඒත් විකුණපු ක්‍රමේ තමයි වැරදි.

එතනදි මට තේරුන දෙයක් තමයි මේ CD මිලදී ගත්තෙ බොහෝ දෙනාට ලිනක්ස් ගැන නිසි අවබෝධයක් තිබුනෙ නෑ කියන එක.

එක් නරඹන්නෙක් ලිනක්ස් වල තියෙන විශේෂත්වය මොකද්ද කියලා ඇහුවම මේ තෙල් බේත් කාරයා කියපු කතාව ඔහුගේ වචන වලින්ම මෙහෙමයි...

"මේකට වෛරස් එන්නෙ නෑනෙ... වෛරස් එන්නෙ නෑ..."

"ඔයාලගෙ පෙන් ඩ්‍රයිවර්ස් බය නැතුව ගහන්න පුලුවන්.. මොකුත් වෙන්නෙ නෑ....."

ලිනක්ස් වලයි වින්ඩෝස් වලයි තියෙන ප්‍රධානම වෙනස්කම මේකද? ඇත්තටම ලිනක්ස් වලට වෛරස් එන්නෙ නැද්ද. නැත්නම් වෛරස් ආවට ලිනක්ස් ඉලක්ක කරගෙන වෛරස් ලියවෙනවා අඩුද?

අපි ඇත්ත කතා කලොත් තාමත් ලංකාවෙ පරිගනක පරිශිලකයන් වැඩි දෙනෙක් භාවිතා කරන්නෙ වින්ඩෝස් හොර කොපි.ඉතින් ඔය වෛරස් නෑ කියන ලිනක්ස් තියෙන පරිගනකයක ඉඳල File එකක් වින්ඩෝස් තියෙන පරිගනකයකට දාල බලන්න තියෙන වෛරස් පුමාණය.

මට මේ කතාව ඇහුන වෙලේ මතක් උනේ මේ සිංහල බ්ලොග් අවකාශේ ඉන්න අපේ සහෝදරයො සමහර වෙලාවට අතිනුත් වියදම් කරගෙන FOSS ප්‍රචලිත කරන්න දරන වෑයම. ඒ වගේම තමයි ඔවුන් කිසිම වෙලාවක මේ ලිනක්ස් වලට වෛරස් එන්නෙ නැති කතාව උලුප්පලා කියන්නෙ නෑ. වෙන්න ඕනෙත් ඒකයි නවකයින්ව නොමග නොයවා හරි දේ කියා දී හරි මග යැවීමයි.

මේකෙන් කාගෙ හරි හිත රිදුන නම් සමා වෙන්න ඕන.

කසළ ප්‍රතිචක්‍රීකරණය මගින් පරිසරය සුරැකීමට බිඳක් හෝ දායක වෙමු

2009-11-20T13:35:00.005+05:30

අපගේ නිවාස සහ කාර්යාල පිරිසිදුව තබා ගැනීම පිණිස අප විසින් බැහැර කරනු ලබන අපද්‍රව්‍ය සමග ඇති පොලිතීන් , ප්ලාස්ටික් වැනි දිරාපත් නොවන හෝ දිරාපත් වීම පිණිස අවුරුදු ගණනාවක‍් ගතවන ද්‍රව්‍ය මගින් පරිසරයට සිදුවන හානිය ගැන ඔබ මොහොතක්වත් සිතනවද. මා මේ පැවසීමට තනන්නේ එහි ආදීනව ගැන නම් නෙවෙයි. කසල පුතිචක්‍රීකරණ ක්‍රියාවලියකට ඔබටත් සම්බන්ධ විය හැකි ආකාරයක් ගැනයි. දැනට මෙම ක්‍රියාවලිය අප සේවාස්ථානය තුලද ඉතා සාර්ථකව ක්‍රියාත්මක වන අතර පරිසරයට අප ආයතනය මගින් බැහැර කරන අපද්‍රව්‍ය ප්‍රමානය අවම කර ගැනීමට එමගින් අවස්ථාව ලැබී ඇත.

ඉතාම පහසුවෙන් අපි හැමෝටම මේ දේ කරන්න පුළුවන් කියා මට සිතෙන නිසා මෙසේ ඒ පිළිබඳව සටහනක් තැබීමට සිත්විය. කිරීමට ඇත්තේ ඉතාම සුළු දෙයකි.

1. වෙන වෙනම කසළ බඳුන් 3ක් ගන්න

2. එකක් පොලිතීන් සහ ප්ලාස්ටික් ආශ්‍රිත ද්‍රව්‍ය සඳහාද , තවත් බඳුනක් කඩදාසි වෙනුවෙන්ද , අනික ප්‍රතිචක්‍රීකරණය කල නොහැකි ද්‍රව්‍ය සඳහාද වෙන් කරන්න

3. මෙහිදී භාජන තුනක් වෙනුවට දෙකක් භාවිතයෙන්ද මෙය කල හැකිය. එවිට භාජන දෙක ප්‍රතිචක්‍රීකරණය කල හැකි හා නොහැකි වශයෙන් වෙන් කල යුතුය.

මීට අමතරව දිරා යන අපද්‍රව්‍ය මගින් කොම්පෝස්ට් පොහොර නිපදවා ගැනීම මගින් කසල සම්පතක් බවට හරවා ගැනීමටද හැකිවේ

ඔබගේ කාර්යාලය හෝ නිවස පිහිටා ඇත්තේ කොළඹ නගරසීමා බල ප්‍රදේශය තුල නම් පහත සඳහන් දුරකථන අංක ඇමතූ විට ඔබ එකතු කල කඩදාසි හා පොලිතීන් ඔවුන් ඔබගේ ආයතනයට හෝ නිවසටම පැමිණ රැගෙන යනු ඇත. අවශ්‍ය නම් සතියකට වරක් හෝ දෙවරක් ඔවුන් පැමිණෙනු ඇත.

Neptune Paper – hotline 0777 530 405 – Only Paper

CMC/Abans Recycling Unit – hotline 0718 320 492 (Janaka) – Paper, Cardboard, Plastic Bottles, Polythene, e-Waste.

මා දන්නා පරිදි බොහෝ නගර වල ‍ප්‍රතිචක්‍රීකරණය කල හැකි ද්‍රව්‍ය එකතු කිරීමේ මධ්‍යස්ථාන ස්ථාපනය කර ඇත. ඊට අමතරව ඇතැම් නගර වල බහත මා සඳහන් කල ආකාරයට ලේබල් කර වෙන් කරන ලද කසල බඳුන්ද තබා ඇත. ඔබ කොළඹින් බැහැර ප්‍රදේශයක නම් මෙවැනි සථානයකට කසල භාරදිය හැකිය. අප සැමගේත් පරිසරයේත් අනාගත පැවැත්ම වෙනුවෙන් ඔබේ වටිනා කාලයෙන් මොහොතක් වෙන් කරන්න.

කවදාවත් නාව නිසා හිත පැටලෙන්නේ

2009-11-13T17:15:00.008+05:30

අහිංසක ගැමි යුවතියක් සමග පෙමින් බැඳුනු ගැමි තරුණයෙකු , තරුණියගේ දෙමාපියන් පලමු වරට මුණගැසීමට යාමේදී ඇතිවන තිගැස්ම (දන්නෝ දනිති මේ ගැන) එඩ්වඩ් ජයකොඩි සමග පුණ්‍යා කත්‍රිආරච්චි දෙපල ගීයක ආකාරයෙන් ඉතා අලංකාරව ඉදිරිපත් කරයි.

බකිනි ගහේ බකිනි මලෙන් පාර අහන්නේ
කුරුන්ද ලඟ දෙල්ගහ යට නිවස තියෙන්නේ
කවදද එන්නේ //

කවදාවත් නාව නිසා හිත පැටලෙන්නේ
මං ආවොත් දෙමාපියන් නැතිද බනින්නේ
තනියම එන්නේ //

කැකිරි වැලේ මල් පිපිලා ගෙයි පිලිකන්නේ
ඒ මල් පෙති වලින් ඔබට පවන් සලන්නේ
දෙමාපියන්නේ වරද නොවන්නේ

කවදාවත් නාව නිසා හිත පැටලෙන්නේ
මං ආවොත් දෙමාපියන් නැතිද බනින්නේ
තනියම එන්නේ //

සේල වළලු රන් පවලම් නැතුවයි එන්නේ
හදේ සුවඳ ආදරයයි අරගෙන එන්නේ
හනිකට එන්නේ //

බකිනි ගහේ බකිනි මලෙන් පාර අහන්නේ

කුරුන්ද ලඟ දෙල්ගහ යට නිවස තියෙන්නේ

කවදද එන්නේ //

කවදාවත් නාව නිසා හිත පැටලෙන්නේ

මං ආවොත් දෙමාපියන් නැතිද බනින්නේ

තනියම එන්නේ //

මෙතනින් බාගන්න

අවුරුද්දක් ගෙවුනු ඉක්මන...

2009-11-06T12:30:00.000+05:30

2008/11/06 වෙනිදා තමයි මගේ පලමු බ්ලොග් සටහන ලියවුනෙ. ඒත් ඒ වෙනකොටත් මට අදහසක් තිබුනෙ නෑ මෙච්චර දුරට මම මගේ බ්ලොග් එක පවත්වාගෙන යයි කියලා. නමුත් අවකාශේ සහෝදර සහෝදරයින්ගෙන් ලැබුණු ප්‍රතිචාර තමයි මේක මේ තරම් කාලයක් පවත්වා ගැනීමේ රහස. පාසැල් කාලෙදිවත් කවියක් නිසඳැසක් ලියවුනු නැති මගේ අතින් කවි නිසඳැස් වගේ ඒවා ලියවෙන්න ගත්තෙත් බ්ලොග් එක නිසාමයි. ඒත් මම මගේ ඇත්තම නමින් ලියන නිසා මගේ හිතේ තියෙන හැම දෙයක්ම මෙහි සටහන් කරන්න බැරිවීම ගැන නම් පොඩි පසුතැවීමකුත් නැතුවම නෙවෙයි. අවුරුදු දහයකට පහලවකට කලින් සාමාන්‍ය පෙලට සිංහල රචනාවක් ලිව්වට පස්සෙ මගෙ අතින් මුලින්ම සටහනක් ලියවුනෙ තැන තමයි මේ බ්ලොග් එක. දන්නෙම නැතුව කොහොම කොහොම හරි අවුරුද්දක්ම ලියලා. ඉස්සරහටත් මේක අතාරින්න නම් අදහසක් නෑ. ඒත් ලිවීම සෑහෙන දුරට සීමා වෙයි කියල හිතෙනවා. මොනවා උනත් අවුරුද්දක් පුරාවට මගේ බ්ලොග් එක බලපු කියවපු හැම දෙනාටම බොහොමත්ම ස්තූතියි.

ආදරයත් රසවත් නැත ඒ වගෙ නැත්නම්

2009-11-05T22:15:00.001+05:30

ආදරයේ ඇති තවත් සුන්දර පැතිකඩක් ගැන කියවෙන අපූරු ගීතයක්. ජීවිතයේ කවදාම හරි දවසක අපි හැමෝටම මේ ප්‍රශ්නෙ කාගෙන් හරි අහන්න වෙයි වචනෙන් බැරි උනත් හිතෙන් හරි.

කවදාද කොහොම කොයි තැනකද අප හමු වූයේ

හැමදාම ඇසිමි ඔබ නැත මට පිලිතුරු කීවේ

ඔබ එදා ඉඳන් කී දවසක් මා හැ‍ඩෙව්ව ද

ඔබ එදා ඉඳන් කී දවසක් මා නැලෙව්ව ද

දිනකදි ලංවී දිනකදි ඈතට යනවා

දිනකදි එනවා තව දිනකදි සැංගෙනවා

කවදාද කොහොම කොයි තැනකද අප හමු වූයේ

හැමදාම ඇසිමි ඔබ නැත මට පිලිතුරු කීවේ

දිගටම එහෙමයි අද හෙට මතුත් එහෙමද

අප යන මග නිම වන්නේ කොහෙන් කොහොමද

ජීවිතයට හොඳටම ඇති මේ ලෙස ඇත්නම්

ආදරයත් රසවත් නැත ඒ වගෙ නැත්නම්

කවදාද කොහොම කොයි තැනකද අප හමු වූයේ

හැමදාම ඇසිමි ඔබ නැත මට පිලිතුරු කීවේ

මුල් ගායනය : මිල්ටන් පෙරේරා

උපදින්න ආයේ.... අතගන්න මාගේ....

2009-11-05T11:25:00.001+05:30

උපදින්න ආයේ.... අතගන්න මාගේ......

නැගිටින්න ඔය නින්ද නොනිදා අනේ.......

ඔබ ඉන්න ලෝකේ... පවසන්න මිහිරේ......

මම එන්නෙමී දැන් මා හැර ජීවිතේ......

පය මාගෙ සිඹලා... පිළිගත්තෙ වැඳලා...

දෙවියා ඔබයි මාගෙ කියලා.....

මට ඉන්න කියලා... ඇයි ඉන්නෙ නිදලා......

නැගිටින්න මගෙ හුස්ම දෙමි මා.....

සිහි වෙන්න කියලා... දුන් මුද්ද පලඳා.....

සිටියා එදා මාව රැකලා........

මගෙ වාසනාවන්... සුල‍‍ගේ ගියාදෙන්......

හමු වේවා මතු ආත්මයේවත්.......

මගෙ පරණ ගීත ගොන්න අවුස්සද්දි තමයි මේ ගීතය හම්බ උනේ. ජෝති ගෙ තවත් නොමියෙන ගීතයක්. මෙතනින් බාගන්න.

ආදරය......

2009-10-18T21:42:00.006+05:30

කොහොමද මෙහෙමම වෙනව නම් ??

2009-10-15T16:35:00.000+05:30

මේක මට ඇත්තටම දැන් ටික දවසකට කලින් ආපු ප්‍රතිඵලයක් මගේ 2mbps connection එකට.

Interval ඉවරයි - කට්ටියම ඔලුවෙන් හිටගන්න..........

2009-10-13T21:23:00.011+05:30

අපායට ගිය පොරකට තමන් කැමති දඬුවමක් තෝර ගන්න වරමක් ලැබුනලු. ඔන්න ඉතින් අපේ පොර අපායෙ වටේ පොඩි රවුමක් ගහන්න පටන් ගත්තලු පහසු දඬුවමක් හොයා‍ගන්න. ඔහොම යනකොට එක තැනක කටට ලෝදිය වක්කරනව, තව තැනක කටු ඉඹුලෙ නග්ගවනව ඔය වගේ එක එක දඬුවම් අතරෙ සෙට් එකක් අසූචි වලක බැහැල ෆුල් ආතල් එකේ ඉන්නව දැක්ක අපේ හාදය මෙක හොඳයි කියල පැන්නලු එවෙලෙම වලට. අනේ ටිකක් වෙලා යනකොට යම පල්ලෙක් ඇවිත් කිව්වලු "හා හා දැන් ඉතින් ඉන්ටවල් ඉවරයි. කට්ටියම ඔලුවෙන් හිටගන්න.........." කියල. හෆොයි අපේ හාදය නේද?

මටත් දැන් ඔය වගේම සීන් එකක් වෙලා තියෙන්නෙ. ඉන්ටවල් නම් ඉවරෙටම ඉවර වෙලා. දවාලෙට පොඩි ඇලට් එකක් දාපු කාලයක් මතක නෑ. වැඩ වැඩ වැඩ. බ්ලොග් එක ලියන්න හිතෙන්නෙත් නෑ. ඔලුව නිකම් පුහු වෙලා වගේ. පොත් ප්‍රදර්ශනෙන් ගෙනාපු පොත් ටික අල්ලන්නවත් උනේ නෑ. හ‍යියෝ කොහොමට හිටපු කොල්ලෙක්ද ඈ..?

මට නම් දැන් එපා.......... වෙලා ඉන්නෙ..

පුස් නොබැඳුණු ජීවිතේ..

2009-10-06T07:00:00.003+05:30

මෙම ලිපිය මම තවත් අවුරුද්දකට පමණ පසු ලිවීමට සිතා සිටියත් පුස් බැඳුණු ජීවිතයක් ගැන ලිපිය කියවීමත් එහි මවිසින් පල කල ප්‍රතිචාරයට ලද පිලිතුරු ලෙස රචකයා විසින් මාගේ සාර්ථකත්වය ලඟා කර ගත් අයුරු සඳහන් කරන්නැයි කරන ලද ඉල්ලීමත් හේතුවෙන් මෙම ලිපිය මේ මොහොතේ ලිවීමට සිත් විය.

එහි රචකයා ලියා තිබූ “සිහින වූයේ මගේ සිත තුළ පමණක් හෙයින් අන් අයගේ සතුට වෙනුවෙන් මගේ සිහින බිලි දෙන්නට මට සිදු වී තිබිණ. යාන්තම් උසස් පෙළ නිමා කර ගත් දින සිටම රැකියාවකට පය තැබූ මට සිහින සැබෑ වෙන තැන කරා යාමට ඇවැසි ශක්තියක් හෝ උපකාරයක් හෝ අත් වැලක් තිබු‍ණේ නැත. බොහෝ අනාගත අපේක්ෂා සිහින තුළට දමා දොරගුළු වසා දිනපතා සුළු වැටුපකට රැකියාවට යන්නට මට සිදු විය.” යන කොටස කියවන විට මගේ ජීවිතයද මේ ආකාරයටම ආරම්භ වූ බව මට සිහි විය. නමුත් එහි එක් වෙනසක් වූයේ මම මගේ ජීවිතය පුස් කෑමට ඉඩ නොදීමයි.

මා කුඩා කල සිටම ප්‍රිය කල ක්ෂ්‍රේත්‍රයක රැකියාවක් ලැබීම සමහර විට එසේ වීමට එක් හේතුවක් වන්නට පුලුවන. කුඩා කල ම‍ගේ සම වයස් දරුවන් බෝල පිති ගෙන ක්‍රිකට් ගසන විට මා වයර් කෑලි , ටෝච් බැටරි, ටෝච් බල්බ ආදිය සමග සෙල්ලම් කල බව අම්මා අදටත් පවසයි. උසස් පෙල කරන කාලයේ මාගේ මොලයට වෛරසයක් ඇතුළුවීම නිසා හටගත් අසනීප තත්වයක් හේතුවෙන් වසර ගනනකට මට මොලේ වෙහෙසා වැඩ කිරීම පාඩම් කිරීම ආදිය වෛද්‍ය නිර්දේශය මත තහනම් විය. ඒ වන විට උසස් පෙලට අයදුම්පත් දමා තිබීම නිසා පාසැලේ හා උපකාරක පන්ති වල පාඩම් වලට සවන් දීම පමණක් කර ලියූ විභාගයෙන් ලැබුනේ සාමාන්‍ය සාමාර්ථ දෙකක් පමණි. සියලුම මිතුරන් ඉතා ඉහලින් උසස් පෙල සමත්ව විශ්ව විද්‍යාලයට යන විට මා හට එක්තරා ආයතනයක පරිගණක පාඨමාලාවක් හැදෑරීමට අවස්ථාව උදා විය. එම පාඨමාලාව අවසානයේ විභාගයෙන් උසස් ලෙස සමත්වීම හේතුවෙන් එම ආයතනයේම උපදේශකයෙකු ලෙස මාගේ වෘත්තීය ජීවිතය ආරම්භ විය.

එම ආයතනයේ අවුරුදු පහකට ආසන්න වූ මාගේ සේවා කාලය තුලදී මා ලද වැටුපට වඩා වටිනා අද්දැකීම් සමූහයක් මම ලබා ගතිමි. එසේම යම්කිසි ප්‍රතිරූපයක් ගොඩනගා ගැනීමටද මට හැකි විය. මාගේ ඊලඟ රැකියා අවස්ථාව උදා වන්නේ මා ඒ ගොඩ නගා ගත් ප්‍රතිරූපය තුලිනි. මෙහිදී මා දකින ආකාරයට ප්‍රතිරූපයක් ගොඩ නඟා ගත යුත්තේ තමන් සතු හැකියාවන් ආශ්‍රිතව මිස බොරු මවා පෑමකින් නොවේ. පාසැල් කාලයේ සිටම ඉලෙක්ට්‍රොනික විද්‍යාව අධ්‍යනය කිරීමද මා හට රුකුලක් විය. ඊට අමතරව වායු සමීකරණ ශිල්පය හා power Electrical පිලිබඳව මා සතු දැනුමද මා සේවය කල ආයතන වලදී මා ලබාගත් කළමණාකාරීත්වය හා ගිණුම්කරනය පිලිබඳ දැනුමද මාගේ මේ ගමන් මගේ මට මහඟු ආශීර්වාදයක් බඳු විය. මා සමග සේවය කල අය වැඩි වැටුප් සහිත රැකියා හඹා යන අතර තුර මා කලේ මාගේ වෘත්තීමය හැකියාවන් වැඩි දියුණු කර ගැනීමයි. එමගින් මාගේ ගමනේ වේගය මදක් අඩු වුවත් මා හට දැඩි ආත්ම විශ්වාසයකින් මා වෙත එන අභියෝග වලට මුහුණ දීමට හැකිවිය.

මා මේ අද සිටින මට්ටමට මා ගෙන ආවේ මවිසින් ලබාගත් වෘත්තීමය සුදුසුකම්, වැඩි දියුණු කර ගත් හැකියාවන් සහ මවිසින් ගොඩනගා ගත් ප්‍රතිරූපයත් එමගින් ගොඩනගා ගත් සමාජ සම්බන්ධතා මගිනුත් බව මා සිහිකරන්නේ නිහතමානී ආඩම්බරයක්ද සමගයි.

මේ වන විට මම රැකියාවේ ඉතා විශාල පිම්මක් පැනීමට සූදානම්ව සිටින අතර ඒ ගැන ලිවීමට තවම කල් වැඩි බව සිතේ. රැකියාවක අනුන්ට වල කපා ඉහලට යනවාට වඩා තමන්ගේ හැකියාවන් උදව්වෙන් ඉහලට යාමට උත්සාහ ගන්නේ නම් ඔබගේ පැවැත්ම වඩාත් ස්ථීර වන බව මාගේ අද්දැකීමයි. ඒ සඳහා පහත සඳහන් දේ අනුගමනය කල යුතු බවද මගේ අදහසයි.

1. තමන් සේවය කරන ආයතනයට , ප්‍රධානීන්ට අවංක වන්න

2. ආයතනයෙන් තමන් ලබා ගන්නා දෙයට වැඩි දෙයක් සැමවිටම ආයතනය වෙත ලබා දෙන්න

3. ඔබගේ සුදුසුකම් කිසිම විටෙක ආභරණයක් කර නොගන්න

4. තමන් අතින් වූ වැරැද්දක් කිසිම විටෙක අනෙකෙකු පිට පැටවීමෙන් වලකින්න

අවසාන වශයෙන් ලොක්කෙක් නොවී නායකයකු වීමට උත්සාහ ගන්න.

අතීත සැමරුම්

2009-09-26T20:32:00.008+05:30

හිරිපොද වෑහෙන සැන්දෑ යාමෙක
මුලින්ම අප හමු වූවා මතකද
එකම කුඩය යට දෑත් පටලවා
පාළු මාවතේ පිය නැගුවා මතකද

ගොම්මනෙ හිනැහුනු හෙන්දිරික්ක මල්
නුඹේ තෝඩු මෙනි මම කීවා
කණාමැදිරියෙකු සේ නුඹ පසුපස
මා එනවා යයි නුඹ කීවා

මිනිත්තු පැය දින අවුරුදු ගතවී
අප ඇත අද දින මහළු වෙලා
තවත් පෙම්වතුන් සිය දහසක් යන
අප ගිය මාවත තරුණවෙලා

එදා වගේමයි හෙන්දිරික්කා මල්
තවමත් ගොම්මනෙ හිනැහෙනවා
මල් වල තනියට හැමදාමත් රෑ
කණාමැදිරියන් ඉගිලෙනවා

පාළු මාවතේ තනිවම යන විට
අපේ මතක මට සිහි වෙනවා
ඉඳහිට වැටෙනා සීතල හිරිපොද
නුඹ කොතැනකදැයි විමසනවා

ඔබේ දයාබර එකම වදනකින් මගේ ආත්මය සුවපත් වේ..............

2009-09-23T21:07:00.002+05:30

සමස්ථ ලෝකයම පිළිබඳව යම් යම් හේතූන් නිසා කල කිරී සිටිනවුන්ට තම ලබැඳියකු වෙතින් ලැබෙන සිනාවක් පවා කතරකට වැටුනු දිය බිඳක් සේ වටිනා බව මම අද්දැකී‍මෙන්ම දනිමි. මේ ගීතය මගිනුත් නන්දා මාලිනියන් කීමට උත්සාහ ගන්නේ එයමය.

ඔබත් මනෝ කායික අද්දැකීම් ලබා තියෙනවාද?

2009-09-17T11:15:00.004+05:30

ආත්මය එහෙමත් නැත්නම් අපේ භෞතික ශරීරයේ අදෘශ්‍යමාන පිටපතක් ලෙස මනෝකාය හැඳින්විය හැකියි (මෙය වැරදි නම් නිවැරදි කරන්න). ඕනෑම මනුශ්‍යයකු ජීවිතයේදී එක් වරක් වත් මෙම මනෝකායික අද්දැකීම් නොදැනුවත්ව හෝ ලැබිය යුතුය. මේ පිළිබඳව විශ්ලේෂණය කල විද්වතුන් පවසන අන්දමට මෙම මනෝකාය (Astral Body) අපගේ භෞතික ශරීරය හා සම්බන්ධ වී ඇත්තේ රිදීවන් තන්තුවකින් බව පැවසේ. කෙනෙකු මරණයට පත්වන අවස්ථාවේදී මෙම රැහැන බිඳී භෞතික ශරීරයත් මනෝකායත් වෙන්වන බවද පැවසේ. මරණයෙන් පසුත් දින කීපයක් යනතුරු එම පුද්ගලයා ජීවමානව සිටි කාලයේ තිබූ ශක්තිය මෙම මනෝකාය සතුව පවතින බවටද අදහසක් පවතී.

කෙනෙකු ඉතාමත් තද නින්දකට වැටුනු පසු / අධික ලෙස මත් ද්‍රව්‍ය භාවිතා කල අවස්ථා වල ඔවුන්ගේ මනෝකාය ශරීරයෙන් වෙන්වී (ශරිරය සමග වන සම්බන්ධතාවය පවත්වා ගනිමින්) සැරි සැරීමට පටන් ගනියි. එසේම දරුණු මාරක අනතුරු වලින් දිවි ගලවා ගත්තවුන් පසුකලෙක තම මරණාසන්න අද්දැකීම් ලෙස කරන ලද විස්තර කිරීම් වලදී , තමන්ගේ ශරීරය දෙස අහසේ හො‍් ඒ අසලක හිඳ බලා සිටිබව පවසා ඇත. මෙයද මනෝකායික අද්දැකීමකි. කෙදිනක හෝ ඔබ තද නින්දක සිටියදී ඉතාමත් උසක සිට ඔබව ඇද වැටෙනු දැනී තද ගැස්සීමක් ඇඟට දැනෙන අවස්ථාවක ඇහැරී තිබේද? එසේ දැනෙනුයේ ශරීරයෙන් වෙන්වූ මනෝකාය නැවතත් ශරීරය හා සම්බන්ධ වීමේදී බව පැවසේ.

භාවනා කිරීම වැනි දේ කිරීමෙන් මනස දියුණු කල විට මෙම මනෝකාය අපට අවශ්‍ය විටෙක ශරීයෙන් පිටතට ගත හැකි අතර එමගින් යම් යම් ක්‍රියාකාරකම් වලද යෙදීමට හැකි බවද මා අසා ඇත.

මා හටද මෙවන් අදදැකීම් මාගේ කුඩාකාලයේදී ලැබී ඇත. මා හට තදින් උණ ගත් බොහෝ අවස්ථාවල මා අහසේ පාවී ගොස් මා බොහෝ සේ ඇළුම් කල ස්ථාන වල සැරිසරනු දැනී ඇත. ඒ අවස්ථා වලදී මාගේ භෞතික ශරීරය ඇඳ මත තිබෙනුද දැක ඇත්තෙමි. එකල මෙම අද්දැකීම මට තේරුම් ගැනීමට නොහැකි වුවත් පසු කාලීනව මේ පිලිබඳ තොරතුරු සෙවීමේදී මෙය මනෝකායික සංචාරයක් බව පසක් විය.

මේ පිලිබඳ වැඩිදුර විස්තර මෙතනින් ගන්න පුලුවන්.

(අ)සම්මත පෙමක්

2009-09-10T21:55:00.002+05:30

නිල්මිණි දෑසේ මැවු ආලොකේ..............

2009-09-01T19:10:00.001+05:30

තමා අතහැර ගිය ආදරණීය දෑසක් පිළිබඳ මතකය ආවර්ජනය කරමින් විරහව විඳින පෙම්වතෙකුගේ සිතේ ඇතිවන හැඟීම් ලයාන්විත ලෙස කැටිකොට සිසිර සේනාරත්න ගායනා කරන මේ ගීතය තවත් මගේ ප්‍රියතම ගීත අතරින් එකක්.

නිල්මිණි දෑසේ මැවු ආලොකේ
හද මැදුරේ නැත නිවුනේ
මල් වැනි ඒ හද මල් මෙන් මැලවී

ඇයි අද සෝ ගී නැගුනේ
ඇයි අද සෝ ගී නැගුනේ

නිල්මිණි දෑසේ මැවු ආලොකේ
හද මැදුරේ නැත නිවුනේ

මදු මලකට බඳු මුව මදහාසේ
මදු මලකට බඳු මුව මදහාසේ
රන් මුතු මිණි කැට වටිනා
ආදරයක රත් සිහින මවා දුනි
පෙම්බර සිතිවිලි අමුණා
මදුමල පරවී මුතු ඇට විසිරී
මා හැදු මාළිග බිඳුනා
එහි ආලෝකය නිවුනා
එහි ආලෝකය නිවුනා

නිල්මිණි දෑසේ මැවු ආලොකේ
හද මැදුරේ නැත නිවුනේ

කිංකිණි පිහින හඬින් මසුරන් වැනි
කිංකිණි පිහින හඬින් මසුරන් වැනි
ගැයු ගී මට සිහි වෙනවා
දෙසවන මී පැණි වැනි ඒ ගී හඬ
සුල‍ඟේ අද මුමුණනවා
ගීයට ගීයෙන් බැඳි හද බිඳුනත්
දෑසට කඳුළැලි එනවා
මම තනිවම වැලපෙනවා
මම තනිවම වැලපෙනවා

නිල්මිණි දෑසේ මැවු ආලොකේ
හද මැදුරේ නැත නිවුනේ

වසර 12 කට වැඩි මගේ පන්ති තහනම

2009-08-26T12:50:00.002+05:30

පාසැලක විදුහල්පතිවරයකු විසින් ශිෂ්‍යයෙකු වෙත පැමිණිය හැකි උපරිම දඬුවම සති දෙකක පන්ති තහනමක් බව රූපවාහිනී නාලිකාවකින් අසන්නට ලැබුනු බැවින් මෙය ලිවීමට සිත්විය. මා ශිෂ්‍යත්ව විභාගය සමත්වී අගනුවර ජාතික පාසැලකට ඇතුලත් වූවකි. 1989 වසරේ පාසැලට ඇතුලත් වන විට සැබවින්ම ගුරු පියකු වූ එවකට සිටි විදුහල්පති තුමා මා පාසැලට ඇතුලත්ව වසරක් යාමට මත්තෙන්ම විශ්‍රාම ගියේය.

ඉන් පසු විදුහල්පති ලෙස පත්ව ආවේද සුදුසුකම් හා අත්දැකීම් වලින් අනූන ගුරු පියෙකි. එතුමාගේ සේවා කාලය වසර දෙක තුනකට නොවැඩි වුවත් ඒ කාලය තුල අප පාසැලේ ශීෂ්‍යයන් කිනම් තැනකදී වුවද මේ අසවල් පාසැලේ ශිෂ්‍යයෙක්ය ලෙස හඳුනා ගත හැකි වන ලෙස පාසැල් විනය මගින් අපහට අනන්‍යතාවයක් ගොඩ නගා දුන්නේය. මෝසා යනුවෙන් සිසුන් අතර ප්‍රසිද්ධ වූ, අඩි පහක් තරම්වත් උස නොවූ ඔහු වෙත අප එදා දැක්වූයේ බයක්ද, ගෞරවයක්ද යන්න අදටත් ප්‍රහේලිකාවක් වන්නේ ඔහු තරමක් දරුණු පාලකයකු ලෙස ප්‍රසිද්ධව සිටියත් ඔහු සේවයෙන් විශ්‍රාම යන දා අප සියළුදෙනාගේම නෙතට කඳුලක් මතුවූ බැවිනි. "පුතාල මට මෙච්චර ආදරෙයි කියල දන්නව නම් මම මේතරම් ඉක්මනට විශ්‍රාම යන්නෙ නෑ" යනුවෙන් එදා ඔහු පැවසූ වදන් අදත් අප සියළුදෙනා තුලම අදටත් වරදකාර හැඟීමක් නිතැතින්ම ඇතිකරයි. ජාත්‍යන්තර පාසැල් වල විනය පිලිබඳව කතා කරන විය දැනට ඔහු විසින් කොලඹ ප්‍රදේශයේ පවත්වාගෙන යනු ලබන ජාත්‍යන්තර පාසැල ජාතික පාසැලකටත් වඩා ඉදිරියෙන් ඇති බව පැවසිය යුතුමය.

ඉන්පසු විදුහල්පතිවරයෙකු නොමැතිව වසරකට වැඩි ගන්ධබ්භ කාලයක් ගෙවූ පාසැලට කනකොකා හඬන්නේ එවකට සිටි අධ්‍යාපන ඇමතිගේ හෙංචයියකු වූ වනාතමුල්ල ප්‍රදේශයේ පාසැලකින් පන්නා දැමූ පුද්ගලයකු අප පාසැලේ විදුහල්පති ලෙස පත්වීමත් සමගය. ඔහුගේ මුල්ම රාජකාරිය ලෙස ඔහු සිදුකලේ එවකට අප විවේකයක් ලද විටෙක දුව පැන ඇවිදින ලද පාසැල තුලම වූ ගුරු නිවාසය අවට වූ තුරු සෙවන වටකොට තාප්පයක් බැඳ ඔහුගේ පෞද්ගලික පරිහරණය සඳහා වෙන්කර ගැනීමයි. සාමාන්‍යයෙන් උදෑසන දහයෙන් පමණ පසු ඔහු පුරුද්දක් ලෙස බීමත්ව සිටි බවද නොරහසකි. මේ මා උසස්පෙල හදාරන කාලයයි. එකල අපහට සිටි හොඳම ගුරුවරුන් බොහොමයක් මොහුගේ නොමනා ක්‍රියා හේතුවෙන් පාසැල හැරගිය බවද නොරහසකි. සිසුන් පිරිසක් විසින් යම්කිසි හේතුවක් නිසා කරන ලද වාර විභාග වර්ජනයක කොටස් කරුවකු ලෙසට, අසනීප තත්වයක් හේතුවෙන් විභාගයට නොපැමිණි මාද අසු වන්නේ මේ අතරය. මවිසින් අදාල වෛද්‍ය වාරතා ඉදිරිපත්කල පසු මේ පුද්ගලයා "තමුසේ Cadet කෙනෙක් නේද" යි විමසා " ආයෙත් මම දන්වල එවනකම් ඉස්කෝලෙ එන්න එපා" කියා පැවසුවත් දැනට අවුරුදු 12 කටත් වැඩි කාලයක් ගෙවී ගොසිනුත් තවමත් මාහට පාසැල් එන්න යයි ඔහු විසින් දන්වා එව්වේ නම් නැත. වැරැද්ද මා ශිෂ්‍ය භටයකු වීමය. මගේ වාසනාවකට එකල මාගේ පන්ති භාර ගුරුතුමා මාගේ මිතුරකු අත "මේ යකා තාරකට එන්න කියන්නෙ නෑ. උට ඕක මතකත් නැතුව ඇති. මම කිව්ව කියල තාරකට එන්න කියනව" යනුවෙන් පණිවිඩයක් නොඑවන්නට මාගේ පාසැල් ගමනද එතෙකින් නිමා වන්නට බොහෝ දුරට ඉඩ තිබින. උපාධියක් වත් නැතැයි කියන මේ පුද්ගලයා සිටි කාලය තුල පාසැලේ වාර්ෂික ත්‍යාග ප්‍රදානෝත්සවය පවා නොපැවැත් වූයේ උපාධි කබාය වෙනුවට වැහි කබායක් වත් පැලඳ ඒමේ අදහසින් වැහි දිනයක් එන තුරු කල් බැලූ නිසා බවටද ඒ දිනවල ප්‍රචාරයක් තිබුනි. වසර කීපයක්ම පාසැල කාබාසිනියා කල මොහුගෙන් පාසැල ගලවා ගැනීමට අවසානයේ ආදිශිෂ්‍ය සංගම් නිලධාරීන්ට පිහිට වූයේ අධිකරණයයි. ඉන් පසුව නම් පාසැලට යහපත් කාලයක් ලබා ඇති බව මෑතකදී පාසැල වෙත ගිය මා හට දැක ගන්නට ලැබුනි.

මෙය අධ්‍යාපනය දේශපාලනීකරනය වීමේ එක් කුඩා ප්‍රතිඵලයක් පමණි. මෙවන් සිදුවීම් වලක්වා ගැනීමට අධ්‍යාපන ක්ෂේත්‍රය සහ පාසැල් තුලින් දේශපාලනය බැහැර කිරීමට පාලකයින් පියවර ගන්නේ නම් යහපත් ශීෂ්‍ය පරම්පරාවක් බිහිකර ගත හැකි අතරම සුන්දර පාසැල් දිවිය මෙවන් අද්දැකීම් වලින් අසුන්දර නොවනු ඇති බව මගේ අදහසයි.

දෛවය මෙය නම්.. සුදු අපි නාඬමු...... හමු වෙමු... මතු සංසාරයේ.......

2009-08-21T23:25:00.000+05:30

මේ දවස් වල සිංදු ගැන ලියනව වැඩිද මන්දා. මොනව කරන්නද අමතක වෙලා තිබුනු සිංදු ‍මේ ටිකේ මතක් වෙනව. මේත් එයින් එකක්. මට මතක විදියට මේ ගීතය ඇතුලත් වුනේ 1985 වසරෙදි නිශ්පාදනය වුනු සුනිල් සෝම පීරිස් අධ්‍යක්ෂණය කල "ඔබට දිව්රා කියන්නම්" කියන චිත්‍රපටියෙ. ගායනා කලේ එච් ආර් ජෝතිපාල.

පාළු සුසානේ ප්‍රේම පුරාණේ
කඳුළු විලාපේ මා තමයි
අප දෙදෙනාගේ එදා සෙනේහේ
සැමරුම් කිසිදා මැකී නොයේ
මට අමතක නෑ.. ඔබට මතක නෑ..

ප්‍රාණය අද හෝ හෙටින් නිමා වී
ආදරයක් මිය යාවිදෝ
හදවත ගොළු වී ඔබේ නාමයෙන්
ජීවිතයක් නවතීවිදෝ
මා විමසන්නෙමි කියන්නකෝ මට
කෙලෙසද මේ ලෙස කුරිරු උනේ

මගෙ අත්තටු බිඳ පියා සලාලා
යන්නට ඔබ පැතු චේතනා
ඔබයි දිනූවේ පරාජිතයි මා
මේකද මට දුන් වාසනා
ආදර රේඛා සුසුම් හෙලාවී
කම්පා කරවා මහී තලේ

දෛවය මෙය නම් සුදු අපි නාඬමු
හමුවෙමු මතු සංසාරයේ
කුරා කුහුඹුවන් හෝ නොවිඳීවා
ඇවිලෙන මේ ගිණි මා ලයේ
ඔබ නොව ලඳුනේ මමයි සදාකල්
අසරණ වූයේ කුමාරියේ

මෙතනින් බාගන්න

Direct Marketing

2009-08-19T12:31:00.014+05:30

පහුගිය සති ඉරිදා අපේ නිවසට ආවා අවුරුදු 20 - 25 විතර කොලු ගැටයෙක්. මාව දැක්ක ගමන් "සර් මම ගාල්ලෙ අහවල් ආයතනයෙ පාඨමාලාවක් හදාරනව, මේ තියෙන භාණ්ඩ වලින් මිලදී ගන්න හැම භාණ්ඩයකටම එක ලකුණ බැගින් ඒකෙ අවසාන පරීක්ෂණයෙදි ලැබෙනව, ඒක නිසා සහයෝගයක් හැටියට මොනව හරි අරගන්න" කියල මනුස්සයා සුපුරුදු හෑල්ල කියවන්න ගත්ත. මම සාමාන්‍යයෙන් ඔය වගේ බොරු කාරයින්ගෙන් කිසිම දෙයක් අරගන්නෙ නැති නිසා මේ ලමයටත් තේරුම් කරල දීල හරවල යැව්වා. ඇයි හත්වලාමෙ පරීක්ෂණයකට ලකුණු ගන්න බඩු විකුණනවා නම් ගාල්ලෙ ඉඳල මෙච්චර දුරක් එන්න ඕනද? ඔය ගමේ හිතවත් කීප දෙනෙකුට කිව්වනම් එක එක ගනියිනෙ.

මට ඒ වෙලාවෙ හිතුන ඇයි මිනිස්සු තමන්ට සහජයෙන්ම ලැබිල තියෙන යම් යම් හැකියාවන් හඳුන ගෙන ඒ ඔස්සේ තම ජීවිතය ගොඩ නගා නොගෙන මේ වගේ බොරු කියල සල්ලි හොයන්න යන්නෙ කියලා. මේ ක්‍රමය හදුන්වන්න යොදා ගන්න Direct Marketing කියන වචනයත් මේකට සුදුසු නෑ මට හිතෙන විදියට. Direct Marketing ක්‍රමේදි මේ වගේ බොරු කතන්දර කියන්නෙ නෑ. මේක නිකන් අර අසනීප වලට බෙහෙත් ගන්න කියල බස්වල සල්ලි එකතු කරනව වගේ වැඩක් මම දකින විදියට.
මිනිස්සු මේ වගේ දේවල් වලට පෙලඹෙන්න යම් තාක් දුරකට අපේ රටේ අධ්‍යාපන ක්‍රමයත් වගකියන්න වෙනව. මොකද දැනටත් අපේ රටේ රැකියා වෙලඳ පල ඉලක්ක කර ශිෂ්‍යයන්ගෙ හැකියාවන් හඳුනාගෙන ශිෂ්‍යයයන් ඒ වෙත යොමු කිරීමේ නිසි ක්‍රමවේදයක් ක්‍රියාත්මක නොවන නිසා. ගොඩගහ ගත්ත සහතික ප්‍රමාණයට ගැලපෙන රැකියාවක් හොයන අපේ මිනිස්සු තමන්ගෙ හැකියාවනට ගැලපෙන රැකියාවක් හොයන්න පෙලඹෙන දවසට මේ ප්‍රශ්න වලට විසඳුමක් ලැබෙයි කියල මට හිතෙනවා.

සුදු නොමැති ලොවක තනියෙන් හිඳ පලක් නෑ

2009-08-17T22:25:00.005+05:30

ය‍මෙකුට යම් දෙයක අගය වැඩිපුරම දැනෙනුයේ තමාට එය අහිමිව ගිය පසුව බව මම අත්දැකීමෙන්ම දන්නා දෙයකි. මෙම ගීතයේ එන " ගල් කැට අතරින් මැණිකක් ඇහිඳීම අසිරුයි........ ඇහිලූ මැණිකද සුරකින එක ඊට අසීරුයි...." යන පද පේලි වඩාත් හදවතට සමීප බවක් දැනෙන්නෙ ඒ නිසා වෙන්න ඇති. මේ ගීත වලට අද බිහිවන රූප පෙලකට වචන ටිකක් දාපු ගීත වලට වඩා සජීවී බවක් තියෙනව කියලයි මට නම් හිතෙන්නෙ. ඒ නිසා තමයි මේ ගීත රූප රචනය නොකලත් ශ්‍රවනය කරන ඔනම වෙලාවක අපේම අතීතය චිත්‍රපටියක රූප පෙලක් වගේ අපි ඉදිරියෙ මවන්න පුලුවන් වෙලා තියෙන්නෙ.

සඳ වැසුනට ඉර ගිලුනට කමක් නෑ

මල් වැටුනට තරු නිවුනට කමක් නෑ

ඔබ ආයෙ දකින තුරු මට ඉවසුමක් නෑ

සුදු නොමැති ලොවක තනියෙන් හිඳ පලක් නෑ

ඔබ නම ඇසුමයි මට ඇති ඉමිහිරි සංගීතේ

සුදු මා ඇමතීමයි මා ඇහු මිහිරිම ගීතේ

ගල් කැට අතරින් මැණිකක් ඇහිඳීම අසීරුයි

ඇහිලූ මැණිකද සුරකින එක එයිට අසීරුයි

සොඳුර එයිට අසීරුයි.......

ඔබ සිටින පාළු සෙහොනක් වුව මට හොඳයි කියා

මම එමි රජදහනක් ලැබු ලෙස හැම සැපක් තියා

මුළු ලොවම අමතකයි ඔබ ලඟ සිටින වෙලාවේ

ඒ මොහොතක මගෙ අවසානය ලඟා වුනාවේ

අවසන් හුස්ම ගියාවේ.............

මෙතනින් බාගන්න

ඉගිල්ලී වහා යන්නට ඇගේ පැල සොයන්.....

2009-08-15T22:20:00.002+05:30

මිල්ටන් පෙරේරාගේ ගීතවලින් මම කැමතිම ගීතයක් තමයි මේ. අහල බලන්න ඇත්තටම ඔයාලටත් කවදකම හරි මෙහෙම හිතිල තියෙනවද කියල.

මෙතනින් බාගන්න.

මොර - දැකල තියෙනවද?

2009-08-09T18:40:00.001+05:30

මොර කියන්නෙ අපේම දේශීය පලතුරක් මම දන්න විදියට. කාලා තියෙන අය දන්නව ඇති ඒකෙ රහ කොහොමද කියලා. ටිකක් රඹුටන් වගේ උනත් මටනම් ඊටත් වඩා රසයි. නමුත් ගෙඩි නම් ඉතාම කුඩාවට තමයි හැදෙන්නෙ. ඒ වගේම තමයි මොර කන්න නම් මාර දුකක් විඳින්න වෙනවා. මොකද මේ ගස් සාමාන්‍යයෙන් අඩි 20 - 30 වුනාට පස්සෙ තමයි ගෙඩි හැදෙන්නෙ. ඒකත් හැදෙන්නෙ අතු අගිස්සෙ. "අතු කඩා මොර කනවා වගේ" කියලා කතාවක් තියෙනවනෙ. මම ජීවිතේටම දැකපු එකම මොර ගහ තියෙන්නෙ අපේ මිදුලෙ. මේ තියෙන්නෙ ඒකෙන් වැටුනු ඉත්තක් පහලින් තියෙන්නෙ ඒ ගහේ පින්තූරයක්. වැඩි පිරිසක් මොර ගැන අහල තිබුනට දැකල නැතිව ඇතිනෙ. ඒ අයට බලාගන්නත් එක්ක තමයි මේක බ්ලොග් එකේ දාන්න හිතුවෙ.

හිරු දුටු පිණි කැට

2009-08-07T21:20:00.000+05:30

ටකේ කරේ

2009-08-07T13:32:00.005+05:30

මේක මේ අපේ යාළුවෙකුට වුන සිදිධියක්. මේකා ටිකක් විතර මනමාලයා. කෙල්ලන්ව දැලේ දා ගන්න පදුම හැකියාවක් තියෙන්නෙ. ඔන්න එක දවසක් ඔය වගේ කොහේදි හරි සෙට් වෙච්චි ගෑණු පරාණයක් SMS එකක් එවලා. සිංග්ලිෂ් වලින්. මිනිහා ඉතින් යාළුවන්ට ඇහෙන්නත් එක්ක SMS එක කියවන්න ගත්තා. "ඔයාට කොහොමද?....." බ්ලා.... බ්ලා.. බ්ලා.... "මම නවතින්නම්...." කියලා මිනිහා කියවන එක නවත්තලා කල්පනා කරන්න ගත්තා ෆෝන් එක දිහා බලාගෙනම. ටික වෙලාවක් ඉඳලා මිනිහා එකපාරටම කෑගහල ඇහුව "ඒයි මොකද්ද බං මේ ටකේ කරේ කියන්නෙ?...." කියලා. බැලින්නම් කෙල්ල අන්තිමට Take Care කියලා ගහල එවල.

මාරක අනතුරක්...

2009-08-06T21:15:00.006+05:30

එක් පෙති මලක් විය නුඹ මගෙ අත් දෙකට............

2009-08-03T21:54:00.001+05:30

සුනිල් එදිරිසිංහයන් ලයාන්විත හඬින් මේ ගීතය අසන සැම විටම මට නැවතත් මගේ පාසැල් කාලය මගේ ඇස් ඉදිරිපිට මැවෙන්නෙ මේ කතාවට 100% ක්ම සමාන ප්‍රේමණීය අද්දැකීමක් උසස් පෙල කරන කාලෙදි මාත් ලබා තියෙන නිසා වෙන්නැති. එහෙම කිව්වම ඉතින් කතාව නොකිව්වට හිතාගන්න පුලුවන්නෙ. ඒකාලෙ කොහුවල හන්දියෙ පැය ගනන් කාපු කටු මතක් වෙන කොට නම් අමුතුම මිහිරක් දැනෙනවා හිතට. පීටර්සන් පාරෙ තියෙන ලයිට් කණු ටෙලිෆෝන් කණු වලට කතා කරන්න පුලුවන් නම් කතාව කියයි. මේ සිදුවීම වෙලා දැනට අවුරුදු 12 කටත් වැඩි වුනත් තාමත් මතකයෙ තියෙන්න හේතුව තමයි ඒක මගේ පලවෙනි පෙම් කතාව වීම.

සමරු පොතේ (new version)

2009-07-29T20:40:00.000+05:30

21

2009-07-24T11:55:00.005+05:30

කාලෙකට පස්සෙ බලන්න ලැබුණු ටිකක් අමුතු විදියේ කතා තේමාවක් සහිත සිනමා නිර්මාණයක් කිව්වොත් හරි. කතාව ගොඩනැගිල තියෙන්නෙ හාවර්ඩ් වෛද්‍ය විද්‍යාලයට යන්න ආසාවෙන් ඉන්න ඒත් මුදල් නැති නිසා ශිෂ්‍යත්වයක් බලාපො‍රොත්තු වෙන බෙන් කැම්ප්බල් නම් ශීෂ්‍යයෙක් වටේ. මොහුගේ ගුරුවරයෙකු මගින් හඳුනා ගන්නා පස් දෙනෙකුගේ කණ්ඩායමක් සමග සති අන්ත වලදී රහසිගතව වේගාස් නගරයේ කැසිනෝ ශාලා වලදී Black Jack නැමැති කාඩ් ක්‍රීඩා කිරීම මගින් අධ්‍යාපනයට අවශ්‍ය මුදල් ඉපයීම සම්බන්ධ කතාවක් තමයි සාරාංශය. කතාව ආරම්භ වෙන්නෙ රොබින්සන් ශිෂ්‍යත්වය සඳහා පැවැත්වෙන සම්මුඛ සාකච්ඡාවකින්. එහිදී පැවසෙන පරිදි ශිෂ්‍යත්වය හිමිවන්නේ සවන්දෙන තැනැත්තා අන්දුන් කුන්දුන් කරවන(that will dazzle the recruiter) අන්දමේ ජීවන අද්දැකීම් සහිත කෙනෙකුට බව අවඥා සහගතව බෙන් වෙත පවසන පුද්ගලයා කතාව අවසානයේ ඉන්න විදිහ ඔයාලම බලන්නකො.

මෙතනින් බාගන්න

රේගු නිලධාරින් එපා කියද්දි මිනිස්සු බලෙන්ම පගාව දෙන්නෙ ඇයි?

2009-07-16T21:20:00.001+05:30

අපේ කොම්පැණියට ලැබුනු ඇණවුමකට අදාල අයිතමයේ කොටසක් සත්ව සමකින් නිෂ්පාදනය කර තිබීම නිසා වුනු අකරතැබ්බයක් නිසා තමයි මේක ලියන්න හිතුනෙ. අපේ Export Agent ට කතා කලාම සම් භාණ්ඩ අපනයනය කරනව නම් වන ජීවී සංරක්ෂණ දෙපාර්තමේන්තුවෙ අවසර පත්‍රයක් අවශ්‍ය බව පැවසු නිසා මම කතා කලා වන ජීවී සංරක්ෂණ දෙපාර්තමේන්තුවට. එතනින් කියපි හරකුන්ගෙ වගේ හමකින් හදපු එකක් නම් බලපත්‍ර අවශ්‍ය නැත වෙනත් කැලෑ සතෙකුගේ හමක් නම් කොහොමත් අවසර දෙන්නේද නැත කියලා. රේගුවෙන් බලපත්‍ර ඉල්ලුවොත් කතා කරන්න කියල ඒ කතා කරපු කෙනාගෙ දුරකතන අංකයත් දුන්නා. ඇත්තටම සතුටු විය හැකි මට්ටමේ සේවයක් එතනින් ලැබුණු බවත් කියන්න ඕන.

මාතෘකාවට අදාල දේ කියන්න හදන්නෙ දැන් තමයි. මට දැන් මේක හතර බීරි කතාවක් වෙලා නිසා ආනයන අපනයන ක්ෂේත්‍රයේ රැකියාව කරන මගෙ යාළුවෙකුට කතා කලා. මිනිහා මට දුන්නා ශ්‍රී ලංකා රේගුවෙ තොරතුරු අංශයෙ දුරකථන අංකය. අයියෝ ගන්නවා ගන්නවා මුන් උස්සන්නෙ නෑනෙ. බැරිම තැන ගියා රේගුවෙ වෙබ් අඩවියට. එතන තිබුන මගේ ප්‍රශ්නෙට අදාල තැන සෘජු දුරකතන අංකයට කතා කලා. ඒක නම් අපරාදෙ කියන්න බෑ එහා පැත්තෙන් කතා කලා මම ප්‍රශ්නෙ බාගයක් කියන කොටම ඒපැත්තෙන් මම නම් මේ ගැන දන්නෙ නෑ ලොක්කෙකුට දෙන්නම් කියල තවකෙනෙකුට දුන්නා. ඔහොම ඉතින් තුන් හතර දෙනෙකුටම මගේ ප්‍රශ්නෙ මුල ඉදන් කිව්ව. අන්තිමටම කතා කරපු කෙනා තමයි උත්තරේ දුන්නෙ. මට මාර ආතල්. දන්නවද උත්තරේ. " මේක අපිට අදාල දෙයක් නෙවෙයි ඔය වෙබ් එකේ දාල තියෙන නොම්මර වැරදියි හරි තැනට කතාකරන්න." මම ඉතින් ආයෙත් අර යාලුව දුන්න නොම්බරේට පැයක් විතර ට්‍රයි කොරල ගත්ත. අරගෙන ප්‍රශ්නෙ කිව්වා. අදාල අංශයට ඇමතුම දැම්මාම තමයි මට තරු පෙනුනෙ. ආයෙත් අර මම මුලින් කතා කරපු සෙට් එකමයි. මම එහෙමම ඇමතුම විසන්ධි කරල. ගත්ත දැඩි තීරණයක්. Export කරද්දි ප්‍රශ්නයක් ආවොත් එතන ඉන්න Custom Officer ට කියක් හරි දීල වැඩේ ගොඩ දා ගන්නව කියල. මේ ගොල්ලො වැඩිය පගාව ගන්නෙ එහෙම නැති නිසා වැඩේ අප්සෙට් වෙන එකක් නෑ. රේගු නිලධාරින් එපා කියද්දි මිනිස්සු බලෙන්ම පගාව දෙන්නෙ ඇයි කියල මම දැන ගත්තෙ අද.

හොඳ මිත්‍ර සමාගමයක් පවත්වා ගැනීමට නම්....

2009-07-13T21:47:00.007+05:30

අපේ දුකාගෙ යාළුවො ගැන ලියපු පෝස්ට් එක කියවද්දි මටත් හිතුනා මිත්‍ර සමාගමය පිලිබඳ මගේ අද්දැකීම් ටිකක් පෝස්ට් එකක් විදියට ලියල තියන්න. මම ලගින්ම ආශ්‍රය කරන යාළුවො ඉන්නෙ පස් දෙනයි. එයින් එක්කෙනෙක් ඇරෙන්න අනෙක් හතරදෙනාම පාසලේ යාළුවො. ඒ හතර දෙනාගෙනුත් එක්කෙනෙක් විශේෂයි. මම බණ්ඩාරවෙල ඉඳල මෙහෙ ප්‍රාථමික පාසලකට ආපු වෙලාවෙ (1986) මට මුණගැහුණු ඒ යාළුවා මාත් එක්කම ශිෂ්‍යත්වෙ පාස් වෙලා දෙන්නම ඇතුල් වුනේ එකම පාසැලකට. අනික් හතරදෙනා මුනගැහුනෙ ඊට පස්සෙ. අපි හැමෝගෙම ‍දෙමව්පියන් සහෝදර සහෝදරියන් සියළු දෙනාම අපිව සළකන්නෙ තමන්ගෙම පවුලෙ අය හා සමානව. අපේ අම්මා මට ඒ දවස් වල කියන්නෙ උඹට දැන් අම්මලා ගොඩක් ඉන්නවනෙ කියලා. අපි ඉස්කෝලෙන් කට්ටි පැන්නෙ පාඩම් කලේ හැමදෙයක්ම කලේ එකට. මට අද වගේ මතකයි දවසක් උදේක 135 කැලණිය බස් එකක් පිටිපස්සෙ සීට් පේලි දෙකක් අපි තව හය දෙනෙකුයි වෙන් කරගෙන නටපු පිස්සුවක්. ඒ පාසැල් කාලෙ කරපුවයින් ගොඩ ගියෙ නම් ජෝඩු දෙකයි. මාත් ඇතුළුව අනික් හතරම හබක්..
අපි හය දෙනාගෙ බැඳීම වඩාත් ශක්තිමත් උනේ අපි පාසැල් කාලය ඉවර කරලා තම තමන්ගෙ අරමුණු වෙනුවෙන් තරඟ කරන්න ගත්තට පස්සෙ කියලයි මට හිතෙන්නෙ. මොකද ඒ හැල්මෙ දිවීමෙදි අපි අසරණ වුනු අවස්ථා වල අපි තමයි අපිට හිටියෙ. මට හොඳටම මතකයි 2003 දි මම පිස්සෙක් වෙන තරමටම මානසිකව වැටුණු වෙලාවක මාව ගොඩ ගත්තෙ මේ යාළුවො ටික තමයි. ඊට කලින් මට පන දෙන්න හිටපු යාළුවො ඒ වෙලාවෙ මාව පාරකදි දැක්කත් මගඇරලා ගියත් මේ පස්දෙනා මගේ ලගින් හැමතිස්සෙම හිටියා. 2005 වගේ වෙනකොට එක එක යාලුවා විවාහ වෙන්න ගත්ත දැනට අවිවාහකව ඉන්නෙ මමයි මගේ පරණම යාළුවයි විතරයි. ඒ ඔවුන්ගේ මායියන්ගෙනුත් අපේ සමාගමයට හොඳ සහයක් ලැබෙනව.
මේ පහුගිය කාලය ඇතුලත අපි අතර ප්‍රශ්න ඇති නොවුනාම නෙවෙයි. ඒත් ඒ කිසිම ප්‍රශ්නයකට අපේ මිත්‍රත්වයට උඩින් යන්න බැරි වීම සතුටක්. අපි අපේ මේ මිතුරන් අතරෙ නිහඬව පිලිගත් එකඟතාවන් කීපයක් තියෙනවා
1. කිසිම කෙනෙක් කිසිම කෙනෙකුගෙන් කිසිම දෙයක් බලාපොරොත්තු නොවීම. මෙමගින් අපි කරන උදව් ද ගනන් තබා නොගන්නා නිසා හිත් රිදවීම් අඩු වේ.
2. මිතුරන් සැම දෙනාටම තමන් තමන්ම ලෙස හැසිරීමට අවස්ථාව ලබාදීම
3. සෑම දිනකම එක් වරක් වත් දුරකථන ඇමතුමක් දී අනෙක් අය ගැන සොයා බැලීම
4. අවම වශයෙන් මාසයකට දෙවතාවක් අපි ගෙවල් වලින් පිට නිදහස් තැනකදි මුනගැසීම. තම තමන් අතින් වුනු වැරදි ,තම තමන්ගෙ ප්‍රශ්න සහ අනාගත සැලසුම් ගැන සාකච්ඡා කිරීම තමයි මේ හමුවීමෙ ප්‍රධානම අරමුණ
5. අවුරුද්දකට දෙවතාවක් කොහේ හෝ චාරිකාවක් යෑම. මෙයින් එකක් අනිවාර්යෙන්ම අවුරුදු නිවාඩුවෙදි යා යුතුයි. ඒක අනිවාර්යෙන්ම අවමය දවස් තුනයි.
6. උත්සව අවස්ථාවලදී මෙන්ම ශෝකජනක අවස්ථා වලදීත් මිතුරා ලගින්ම සිටිමින් අවශ්‍ය දේ සොයා බැලීම

මෙන්න මේ විදියට තමයි අපි අපේ සමාගමය පවත්වා ගන්නෙ. මේ සමාගමය අපි ජීවත්ව සිටින තුරාවටම මෙසේම පවත්වා ගන්න තමයි අපේ අදහස. මේක කියවල මගේ අනික් යාලුවො තරහ වෙන එකක් නෑ කියල හිතනවා ඒ අය ගැන කිව්වෙ නෑ කියලා. ඇත්තටම ඒ අය කරපු උදව් ඔක්කෝම මට හොඳට මතක තියෙන නිසා තරහ වෙන්න දෙයක් නෑ.

මං විතරද?

2009-07-12T22:08:00.001+05:30

අහන්න

සදාදරණීය ජෝති

2009-07-05T20:00:00.010+05:30

එච් ආර් ජෝතිපාල එහෙමත් නැත්නම් ජෝති අපෙන් සමුගෙන ඊයේ (04/07/2009)ට වසර 22කි. එදා ඔහු ජීවත්ව සිටියදී කසිකබල් පීචං ගායකයකු ලෙස හැදින්වූ ප්‍රබුද්ධ යයි කියා ගන්නා අයට ඔහුගේ අගය වැටහුනේ ඔහු මියෑදුනාට පසුවය. එදා ඔහු මිය යන විට මට වයස අවුරුදු නවයක් වුවද වසර 22කට පසු අදත් මගේ ජනප්‍රියම ගායකයා ඔහු වීම ගැන මම කියන්නෙ ආඩම්බරයෙන්. ජෝති ගැයු ගීත බොහොමයක් හින්දි ගී තනු වලට ගැයූ ඒවා වුවත් එම ගීත අසන විට අපට ඒ බවක් මතකයට නොඑන තරමටම ලයාන්විතව ඔහු ගායනා කලේය. ඊටත් වඩා ඔහු සතුව තිබූ සුවිශේෂම දෙ නම් ඔහුගේ කට හඬයි. චිත්‍රපට ගීත ගායනයේදී ඔහුගේ හඬ ඕනෑම නලුවෙකුට ගැලපුනේය. දැනට මා දන්නා තරමින් එවන් හඬක් ඇත්තේ ග්‍රේෂන් ආනන්දට පමණි. ඔහු මියැදුනාටත් පසුව මෙලොව එලිය දුටුවන්ද සුපර්ස්ටාර්ලා වීමට ජෝතිගේ ගී ගැයීමම ඔහු කොතරම් රසික සිත් ඇද බැඳ ගත්තා දැයි කීමට ප්‍රමාණවත්ය. හදිසියේ තබන මේ කෙටි සටහන ඒ අසහාය ගායකයාට පිදෙන උපහාරයක්ම වේවා!

Hindi Vs Sinhala

2009-07-04T20:22:00.000+05:30

නොමිලේ Mail Server එකක්?

2009-07-03T21:33:00.005+05:30

ඔබට අයිතිව ඔබේම ඩොමේනයක් (Domain) තිබේ නම් දැන් ඔබටම කියා ඊමේල් සර්වරයක් නොමිලේම ලබාගන්න හැකියාව තියෙනව. එමගින් ඔබට අමතර වියදම් දැරීමකින් තොරව you@yourdomain ආකාරයේ ඊමේල් ලිපින උපරිමය 50ක් දක්වා නොමිලේම ලබා ගත හැකියි. මෙම සේවාව අප වෙත ලබා දෙන්නෙ සුප්‍රසිද්ධ ගූගල් සමාගම මගින් සපයන google apps සේවාව මගිනුයි. මෙය දැන් බොහෝ කාලයක සිට සිට ලබා දෙන සේවාවක් නිසා සමහර විට දැනටමත් ඔබ මේ ගැන දන්නවාත් ඇති. නමුත් google apps වෙබ් අඩවියට ඇතුලු වූ විට දැන් මෙම නොමිලේ ලබා දෙන සේවාව ගැන සඳහනක් නැතිම කරම්. ඒකට හේතුව තමයි ඔවුන් ඔවුන්ගේ මෙම සේවාව Corporate සහ Standard වශයෙන් කොටස් දෙකකට බෙදා ඔවුන්ට වැඩි ලාභ ගෙන දෙන Corporate සේවාව පමණක් ප්‍රවර්ධනය කිරීම. නමුත් මෙතනින් ඔබට පුලුවන් Standard සේවාව ලබා ගන්න. ඔබට අවශ්‍ය වෙන්නෙ ඔබේ පාලනය යටතේ පවතින ඩොමේන් නාමයක් පමණයි. මෙම සේවාව Gmail මගින් සක්‍රිය කර ඇති නිසා Gmail හිදී ලැබෙන ආරක්ෂාව වගේම Google calendar, Google docs ආදී සේවාවනුත් නොමිලේම ලැබෙන අතරම මෙය POP3 සහ IMAP සඳහාද සහාය දක්වනවා. ඔබට කරන්න අවශ්‍ය වෙන්නේ ඔබේ ඩොමේනය google apps සමග ලියාපදිංචි කිරීමෙන් පසු ඔවුන් ලබා දෙන සර්වර් ලිපින (Server Addresses) ඔබේ ඩොමේනයේ පරිපාලක පුවරුවේ ඇති MX record එක ලෙස ලබාදීම පමණයි. ඉන් පසු උපරිමය 50ක් දක්වා ඔබට අවශ්‍ය පරිදි ඊමේල් ලිපින නිර්මාණය කර ගත හැකියි.

හිත ගිය සිංදු දෙකක්

2009-07-02T09:00:00.000+05:30

මේ හිංදි සිංදුව Saathi චිත්‍රපටියෙ තමයි තියෙන්නෙ. සිංහල එක ඒ හිංදි සිංදුවෙ තාලෙටම තමයි මිල්ටන් පෙරේරා කියල තියෙන්නෙ.

Spiceworks

2009-07-01T09:03:00.008+05:30

මාතෘකාව දැකල වැරදියට හිතන්න එපා මේ කියන්න යන්නෙ කුළුබඩු සම්බන්ධ කතාවක් නම් නෙවෙයි. මේ කියන්න හදන්නෙ නොමිලේ ලබා දෙන Network Management මෘදුකාංගයක් ගැන. මේකෙ User Friendly ගතිය වැඩියි Wireshark වලට වඩා. ඒ වගේම පහසුකම් අතිනුත් වැඩියි මට හිතෙන විදියට. ඒත් පොඩි කොස්සක් තියෙනව. මේක අපේ පරිගනකයට ස්ථාපනය කලාට ක්‍රියාත්මක කරන වෙලාවට අන්තර්ජාලය හරහා ඔවුන්ගේ සර්වරයක් සමග සම්බන්ධ වෙමින් තමයි වැඩ කරන්නෙ. ඒසඳහා ලියාපදිංචි වීමෙදි අපේ පරිගනක ජාලය සඳහාAdministrator rights තියෙන පරිශීලක ගිණුමක් මුරපදයත් සමග ඔවුන්ට ලබා දෙන්න වෙනව. මම නම් කලේ වෙනමම Admin ගිණුමක් හදල ඒක අක්‍රිය(Disable) කරල තියන එක. අවශ්‍ය වෙලාවට ඒක සක්‍රිය කර ගන්නව.මෙම මෘදුකාංගය මගින් ඔබේ පරිගනක ජාලය සිතියම් ගත කිරීම / එක් එක් පරිගනකය භාවිතා කරනු ලබන Bandwidth එක බලා ගැනීම ආදී සේවා රැසක්ම ඉතා පහසුවෙන් ලබාගන්න පුලුවන්. වැඩි විස්තර මෙතනින්.

රළ බි‍ඳෙන හඬයි රෑ යාමේ ඈත ඇසෙන්නේ...

2009-06-28T22:00:00.001+05:30

අද අරමුණක් නැතුව අන්තර්ජාලයෙ අතරමං වෙලා ඉන්න අතරෙ සිංදුවක් හොයන්න හිතුන. අන්තිමට හොයා ගත්ත. මේ සිංදුව මීට කලින් මම ජීවිතේටම අහල තියෙන්නෙ දෙවතාවයි. ඒකත් ප්‍රයිවෙට් බස් එකකදි. අන්තිම පාරට ඇහුනෙ මීට අවුරුදු හය හතකට කලින්. මේ සිදුවීමම නොවුනත් මීට බොහෝ දුරට සමාන පෞද්ගලික අද්දැකීමක් (තහනම් පෙමක් නම් නෙවෙයි) තියෙන නිසා වෙන්න ඇති මගේ හිතට මේ තරම් තදින් මේ සිංදුව කාවැදුනෙ. මේක ගායනා කරල තියෙන්නෙ ආසිරි ප්‍රියන්ත කියල කෙනෙක්. මට ලැබුනු MP3 ගොණුවෙ Audio Quality එක නම් සතුටුදායක නැහැ.

Porn Site සඳහා සරල පිලියමක්

2009-06-25T21:16:00.003+05:30

ලංකාව තුල ක්‍රියාත්මක අන්තර්ජාල සේවා මගින් අසභ්‍ය වෙබ් අඩවි වෙත පිවිසීම නීතියෙන් තහනම් කර බොහෝ කලක් ගියත් තවමත් ඒක ක්‍රියාත්මක වෙලා නම් නෑ. ඉතින් ‍හුඟ දෙනෙක් මේවා නවත්වන්න කරන්නෙ සල්ලි දීලා Parental controlling software ස්ථාපනය කර ගන්න එක. ඒවත් දැම්ම පලියට වැඩ කරන්නෙ නෑ tuneup කරන්නත් වෙනව. මේ කියන්න යන්නෙ නොමිලේම tuneup කරලම අපිට මේ සේවය ලබා දෙන තැනක් ගැන.

මේකෙ නම ScrubIt . කරන්න තියෙන්නෙ අපේ අන්තර්ජාල සබඳතාවයෙ DNS address එක විදියට මේ අයගෙ DNS Server Address දෙන එක විතරයි. හැබැයි අනික් කිසිම DNS Server Address එකක් වත් මේ සමග යෙදුවොත් නම් වැඩේ අල වෙනව. හරිම සරලයි. වැඩි විස්තර මෙතනින්. තාක්ෂණික දැනුම අඩු අයට මේක කර ගන්න DNS Config Utility එකකුත් තියෙනව මේ අඩවියෙ.

මගේ අලුත් Theme එක

2009-06-24T16:11:00.001+05:30

මට බ්ලොග් එකේ තිබුනු theme එක දැකලම ඇති වෙලා අලුත් එකක් හෙව්වා දාන්න. ඒත් හරියන එකක් හම්බවුනේ නම් නෑ. මොනවා කරන්නද මේ දාල තියෙන එක තමයි ටිකක් හිතට ඇල්ලුවෙ. ඒත් ඒකත් අප්සෙට් වගේ කියල හිතෙනව. ඔයාලට මොනාද හිතෙන්නෙ මේ theme එක ගැන. හොඳ theme download කරගන්න තැනක් දන්නව නම් කවුරු හරි කිව්වොත් ලොකු උදව්වක්. ටිකක් uncommon theme එකක් නම් ‍වඩා හොඳයි. හොඳ එකක් ලැබෙනකම් මේකම ඇඳගෙන ඉන්නව.

අපි ආයේ දවසක.......

2009-06-23T16:10:00.000+05:30

මේ සිංදුව කියන්නෙ කවුද කියල නම් දන්නෙ නෑ මම. Youtube එකේ තමයි තිබුනෙ. හිතට ටිකක් දැනුනු නිසා බ්ලොග් එකේ දාන්න හිතුනා. අහලම බලන්නකො.

18 වෙනිදා

2009-06-17T20:53:00.000+05:30

18 කියන්නෙ මගෙ ජීවිතේ වැදගත් සිද්ධීන් කීපයක්ම සිදු උනු දිනයක්. මම හා හා පුරා කියල මුලින්ම රැකියාවකට කියල ගියෙ 1999 ජනවාරි 18, ඒකෙන් අස් වුනේ 2001 දෙසැම්බර් 18. ඔය අතරෙ පෙම්වතියක් හමු ‍උනා 2001 මැයි 18 (දැන් නම් කවුරුත් නෑ). දෙවෙනි රස්සාවට ගියෙ 2002 ජනවාරි 18. මගෙ රියදුරු බලපත්‍රය ලබා ගත්තෙ 1999 පෙබරවාරි 18. මම මේ ලෝකෙට ඇවිත් තියෙන්නෙ 1978 ජූනි 18 වෙනිද නිසා ඒ ඔක්කොටම වඩා 18 මට වැදගත්.

ඒ කියන්නෙ හෙටට මට අවුරුදුම 31 සම්පූර්ණ වෙනව. මේ අවුරුදු 31 පුරාවටම ලබපු අද්දැකීම් සිහියෙ තියාගෙන ඉදිරි කාලෙ ගෙවන්න තමයි හිතන් ඉන්නෙ. පහු ගිය කාලය දෙස හැරිල බලන කොට දුක සතුට දෙකම සමබරව නොදැනෙන්නෙ ඇයි කියල නම් හිතා ගන්න අමාරුයි. වෙලාවකට දුක වැඩියි. වෙලාවකට සතුට වැඩියි. හැබැයි කවුරු හරි මට අවස්ථාවක් දුන්නොත් අතීතයට ගිහින් මට වැරදුනු තැන් ගැන නැවත සිතා බලන්න මට හදාගන්න තැන් බොහොමයක් වගේම ජීවිතය පුරාවටම දුක දැනුනත් වෙනස් කරන්න බැරි අන් අය වෙනුවෙන් ගනිපු තීරණත් දෙක තුනක් තියෙනව. මගේ ජීවිතේ ඉස්සරහට මහ මෙරක් තරමට බලාපොරොත්තු නම් නෑ. ‍ඉපදුනු දවසෙ ඉදන් හදපු වඩපු දෙමාපියන්ට සලකන එක තමයි තියෙන ලොකුම බලාපොරොත්තුව. ඒ අතරතුරේ ජීවිතේ ගලාගෙන යයි. අපි බලන් ඉමු.

මා තනි නොකරන් සබද

2009-06-10T20:57:00.002+05:30

මට උනු හදියක්

2009-06-03T21:56:00.002+05:30

සතියක් තිස්සෙ එක දිගටම වැඩ කරල අද තමයි නිදහස් උනේ. මුලින්ම උනේ අපේ මේල් සර්වර් IP එක black list වෙන්න ගත්ත එක. හේතුව තමයි මේ සදහා යොදාගෙන තිබුනු ADSL සබදතාවයම අන්තර්ජාල භාවිතය සදහාත් යොදා ගැනීම. නෙට්වර්ක් එකේ මොකක් හරි පරිගනකයකින් ස්පෑම් යවනව. අන්තිමට ඒක හොයා ගත්තෙ Wireshark කියන මෘදුකාංගය භාවිතා කරල. මේ tool එකින් නෙට්වර්ක් එකක හැම පරිගනකයක්ම භාවිතා කරන sevices / ports වෙන වෙනම බලාගන්න පුලුවන්. කොහොම හරි ආසාදනය වුනු පරිගනක දෙක තුන හොයාගෙන සුද්ද කලා කියමුකො හොදම හරිය උනේ ඊට පස්සෙ.
ඔය වැඩ අතරෙ PDC (Primery Domain Controller) එකටත් කෙල උනා. ඒකට හරි ගියෙත් මාස දෙක තුනකට කලින් ගත්තු backup එකක්. ඉතින් ඒ backup එක ගත්තට පස්සෙ ජාලයට එකතු කරපු users ලා සේරම අලුතින් හදන්න උනා. ඒ හදපු ගිනුමෙන් පරිනක වලට ලොග් වෙන කොට settings ඔක්කොම වෙනස් වෙලා Documents / Email මොනවත් නැහැ. අලුත් ගිණුම හදන කොට SID එක වෙනස් වෙන නිසා වෙනම user profile එකක් හැටියට තමයි පෙන්වන්නෙ. Windows Xp වල තියෙන file and settings transfer wizard එකට මේ වගේ දේකට කරන්න දෙයක් නෑ. නමුත් පරණ settings / Documents / Email ඔක්කොම user profile එකක් විදියට තියෙනවා. අන්තිමට ටිකිරි මොලේට ආව අදහසක් ක්‍රියාත්මක කලා. පරිගනකයට Admin විදියට ලොග් වෙලා පරණ profile එකේ ඔක්කොම files / folders අලුත් profile එක උඩින් කොපි කරලා අදාල user ගෙන් ලොග් වෙලා බැලුවා. යන්තම් වැඩේ ගොඩ.

අපි ආයෙත් හමු නොවුනා නම්

2009-05-26T14:47:00.003+05:30

අපි ආයෙත් හමු නොවුනා නම්
ඉස්සර දවසක මිය ගිය සෙනෙහස
යලි ඉපදී මා හද රිදවන්නට
අපි ආයෙත් හමු නොවුනා නම්........

ඔබ නොහඳුනනා විරහ වේදනා
පෙරදා වින්දේ මා පමණයි
හුග කලකින් හමු වී සෝ ලතැවුල්
අදත් විඳින්නේ මා පමණයි.........

සමු ගන්නට නම් අහිමි ආදරෙන්
මේ ලෙස ඇයි අප හමු වන්නේ
ආදරයේ කඳුළින් මිය යන්නද
ජීවිත ඉරණම විසඳෙන්නේ.......

දුර ඈත අතීතයෙ..

2009-05-22T20:43:00.003+05:30

ජීවිතේ අපි කැමති තැනක ඉදන් නැවත පටන් ගන්න අවස්ථාවක් ලැබුනොත් ඔයගොල්ලො මොකද කරන්නෙ. එහෙම අවස්ථාවක් නොලැබුනාට මම නම් කැමතියි අපේ ජීවිතයටත් , පරිගනකයට වගේ Undo එකක් තිබුන නම්. මේ සිංදුවෙන් කියන්නෙත් ඒ වගේ දෙයක්. අහල බලන්නකො.

Taking Chance | හිතන්න දෙයක්

2009-05-20T21:58:00.000+05:30

මුලින්ම අපේ හමුදාව ලබා ගත්තු ජයග්‍රහණයට සුභ පතන්න ඕන. මගේ ගෙවුනු ජීවිත කාලය පුරාවටම තිබුනු යුද්ධය දැන් අවසන්. මම මතක ඇති කාලෙකින් ගෙදරින් පිටවෙන කොට ගිහින් එන්නම් කියලා අම්මට කියලා නෑ. හැමදාම කිව්වෙ මම යනවා කියල විතරයි. ඒත් දැන්නම් ගිහින් එන්නම් කියල කියන්න පුලුවන්. මේ ජයග්‍රහනය ලබාගත් අපේ ත්‍රිවිධ හමුදාවේ රණවිරුවන්ටත්, කවදාවත්ම මගෙන් ඡන්දයක් නොලබපු ජනාධිපති තුමන්ටත් මගේ ප්‍රනාමය මෙසේ සටහන් කරනව.

ඇත්තටම මම මේක බලන්න පෙලඹුනේ අපේ බ්ලොග් කියවනයෙ තිබුනු සටහනක් දැකලා. අපි යුධ ජයග්‍රහනය සමරන වෙලාවෙ බලපු මේ film එක මට නම් හිතන්න ගොඩාක් දේ ඉතුරු කලා. කතාව..ඇමරිකන් හමුදාවෙ ඉහළ නිළයක් දරණ පුද්ගලයෙක් කැමැත්තෙන්ම ඉදිරිපත් වෙනව යුද්ධයෙන් මැරුම්කන සෙබලුන්ගේ මිණී ඔවුන්ගේ ගෙවල් වෙත අරගෙන යාමට. ඒහිදී ඔහුගේ මනස වැඩකරන හැටි,ඔහුට හමුවන පුද්ගලයන් ඔහුට සලකන හැටි ආදිය තමයි මේකෙන් අපිට බලන්න තියෙන්නෙ.

මරණයට මා ලං කරන නුඹ

2009-05-10T21:30:00.009+05:30

---------------------------------------------------------

Lipton’s Seat

2009-05-04T16:36:00.007+05:30

කාලෙක ඉදන් යන්න හිතන් හිටපු තැනක්. ගිය සති අන්තෙ මට යන්න ලැබුනා. මෙතෙන්ට Lipton’s Seat කියන නම ලැබිලා තියෙන්නෙ ලංකාවේ තේ කර්මාන්තයේ පුරෝගාමියෙක් වෙන තෝමස් ලිප්ටන් මහතා තමන්ගේ තේ වගාව නිරීක්ෂණය කිරීම සදහා නැරඹුම් මධ්‍යස්ථානයක් ලෙස භාවිතා කල නිසා යැයි කතාවක් පවතී.
මා මෙම ස්ථානයට ලගාවූ හපුතලේ සිට දඹේතැන්න වතුයාය හරහා වැටී ඇති මාර්ගයට අමතරව , බණ්ඩාරවෙල සිට නායබැද්ද වතුයාය හරහාද තවත් මාර්ගයක් වැටී ඇත. විශාල බෑවුම් සහිත මාර්ගය තරමක් අවදානම් සහිත වේ. වඩාත්ම අවදානම් කොටස වන්නේ ගමනේ අවසන් කිලෝමීටරයක පමණ දුර ප්‍රමාණයයි. එම තොටස පෞද්ගලික තේ වත්තක් මැදින් වැටී ඇති අතර මාර්ගය තාර හෝ කොන්ක්‍රීට් යොදා නොමැති බැවින් වැහි දින වලදී අවදානම තවත් වැඩි වේ. වාහන නැරඹුම් ස්ථානය වෙතම ගෙන යා හැකි වුවත් අවසන් දුර ප්‍රමාණය එම මාර්ගය හුරු රියදුරකු සමග යාම වඩාත් යෝග්‍ය වේ. මේ කොටසට වාහනයක් ඇතුල් කරන්න රු.100/= ක් අය කරනවා.

මීදුම නොමැති දිනවලදී මෙතැනට ලංකාවේ පලාත් පහක් පැහැදිලිව දර්ශනය වන බව පැවසේ. අවාසනාවට මා එහි ලගා වනවිට පලාතම මීදුමින් වැසී අවසානය.

තවත් එක ප්‍රේම කතාවක්

2009-04-28T16:48:00.004+05:30

අපේ ජීවිතේදි අපි ආදරය කරන අයත් සමග මුලු ජීවිත කාලෙම ගෙවන්න ලැබෙන්නෙ කොටසකට පමණයි. නමුත් එහෙම බැරි උනාට උනුන්ට තියෙන ආදරය නම් වෙනසක් වෙන්නෙ නෑ. මේ ඒ වගේ කතාවක්. කියන්නෙ මාලනී බුලත්සිංහල සමග ගුණදාස කපුගේ.

ලබන්නා වූ සිංහල දෙමළ අළුත් අවුරුද්ද සැමටම කිරියෙන් පැණියෙන් ඉතිරේවා.........

2009-04-13T21:14:00.001+05:30

නොනගතේ ලැබුවට පස්සෙ තමයි ඔන්න නිදහසක් ලැබුනෙ කට්ටියට සුභ පතන්න. ඔෆිස් එකේ ඊයෙත් වැඩ (මම විතරක්) . අපේ Mail Server එක කවුරු හරි ආක්‍රමණය කරලා. සැක කරන්න ඉන්නෙ එක්කෙනයි. ඊයෙ පෙරේදා එක්කෙනෙක්ව රස්සාවෙන් අස්කරන්න මම මූලික උනා. එයා තමයි මට සැක. මගේ සැකේ වැරදි වෙන්නත් පුළුවන්. යන්තම් ඊයෙ හවස් වෙනකොට වැඩේ ගොඩ දා ගත්තා. ඊට පස්සෙ ගෙදර රාජකාරි. නොනගතේ ලබනකම්ම ඒව තමයි.
කොහොම හරි මගේ මේ බ්ලොග් එක ලියන්න අරන් දැන් මාස හයක් ඉවරයි. සමහර වෙලාවට මම ලියන දේවල් අනිත් අයට විකාර වගේ පේනවද කියලත් වෙලාවකට හිතෙනවා. ප්‍රතිචාර අඩු වෙනකොට. ඒත් හිට් කවුන්ටරෙයි ෆලෝවර්ස්ලා ගානයි වැඩි වෙන කොට ටිකක් හිත හැදෙනවා. මේවත් කියවන අය ඉන්නවා කියලා. ඉතින් මේ මාස හයට මගෙ බ්ලොග් එක කියවපු හැමෝටම බොහොමත්ත ස්තූතියි මාව දිරිමත් කලාට. ඒ වගේම ලබන්නා වූ සිංහල දෙමළ අළුත් අවුරුද්ද සැමටම කිරියෙන් පැණියෙන් ඉතිරෙන්න කියලා ප්‍රාර්ථනා කරනවා.

අවසර යුවතිය ඈ වෙත යන්නට..!

2009-04-09T06:35:00.002+05:30

අවන් හලේ දැල්වෙන පහන් එලි අතරින් නැගෙන දුම් රැලි අතර දිලිසුනු නෙත් යුවලක් මා අභියස නතර වි ඇත. මා ප්‍රිය සොදුර අමතක කර මේ දෙනෙතින් කරනා ආරාධනයට කෙසේ නම් අවනත වන්නද. නුඹේ පහසට වඩා ඇගේ නොදිලෙන නෙත් යුග තුලින් දකින ආදරය වටිනා නිසා මා හට යන්නට අවසර දෙනු මැන.

හප්පා යාන්තම් ඇති අද නිවාඩු

2009-04-01T20:50:00.003+05:30

හප්පා යාන්තම් ඇති දවස් 16කට පස්සෙ නිවාඩුවක් ගත්ත. හැම අවුරුද්දෙම මේ කාලෙට මේ වගේ තමයි. සංචාරකයො වැඩිපුර එන්නෙ මේ කාලෙටනෙ. සාමාන්‍යයෙන් අවුරුද්දෙ නොවැම්බර් ඉදන් ඊලග අවුරුද්දෙ මැයි විතර වෙනකම් සංචාරකයො වැඩිපුර එනවා. ඊට පස්සෙ නුවර පෙරහැර කාලෙට ටිකක් වැඩිපුර එනවා. ඒ අතරතුර ඉතින් වාරකන් තමයි. ඉතින් සංචාරකයො එන කාලෙට ෆුල් බිසී. දත් කීයක් කියල ගලවන්නද? හික්.. හික්... හැබැයි කවුරු මොනවා කිව්වත් දැන් සංචාරකයන්ගෙ පැමිණීමෙ අඩුවක් තියෙනවා. එන අයගෙ අතෙත් ඉස්සර වගේ මුදල් නෑ. නමුත් මේකට හේතුව යුද්ධය නම් නෙවෙයි. මම හිතන්නෙ ලෝකෙම මුහුණ දීලා ඉන්න ආර්ථික පසුබෑම වෙන්න ඕන.
ඊයෙ නුවර යන්න වුනා එහෙ සර්වර් එකේ ප්‍රශ්නයක් වෙලා. යනකොට ගිය වාහනේ හදිසියෙම මඩකලපුවෙ යන්න වුනා අපේ මුස්ලිම් සගයෙක්ගෙ අම්මා අන්තරා වෙලා. ‍‍ගෙදර අම්මා විතරක් නිසා මම වාහනේ මඩකලපු යවලා බස් එකේ එන්නම් කියලා 3.30ට විතර ආවා ටවුමට. මල කෙලියයි බස් නෑ. ස්ට්‍රයික් එකක්ලු. නුවර ඉදලා එන නගරාන්තර දුම්රියත් 3.00ට පිටත් වෙනවනෙ. අපරාදෙ මඩකලපු ගියානම් හොදයි දැන් කෙහොමත් නුවර නවතින්න වෙනවනෙ කියල හිත හිත ඇවිදගෙන දුම්රියපල ලගට ආවම කවුද කියනව ඇහුනා ඉන්ටර්සිටිය අද ලේට් කියලා. මාත් නිකමට ඇතුලට ගිහින් බැලුවා. මරේ මරු ඇත්තටම ඉන්ටර්සිටිය තියෙනවා. මාත් ඉතින් ඉක්මනට ටිකට් එකක් අරන් දුම්රියට ගොඩ වුනා. අවුරුදු තුනකට පස්සෙ බස් එකක යන්න තිබුනු චාන්ස් එක නැති උනාට ඊට වඩා හොද චාන්ස් එකක් ලැබුනනෙ.
දුම්රියෙ ගමන ඇත්තටම හරිම සුන්දරයි. සුන්දර දර්ශන බොහොමයක් දැක්කත් කැමරාව අතේ නොතිබුන නිසා ඒ ලස්සන බෙදා ගන්න ක්‍රමයක් නම් නැතිඋනා. ඒ එනකොට දැකපු එක දර්ශනයක් මට මගේ පොඩිකාලෙ මතක් කලා. දුම්රිය වෙල් යායක් මැදින් එන වෙලාවක ( ප්‍රදේශය නම් දන්නෙ නෑ ) ඒ අසල ලිදක දිය නාමින් හිටපු පුද්ගලයෙක් බොහොම සන්තෝසෙන් අපිට අත වැනුවා. මට මතක් උනා මම බන්ඩාරවෙල හිටපු කාලෙ tourist බස් එකක් දැක්කාම අපිත් ඒ වගේ අත වනපු හැටි. ඒ කාලෙ නම් පොඩි ලමයි අත වනන කොට සංචාරකයො ටොෆි චොකලට් එහෙම දීල යනවා. කොහොම කොහොම හරි 6.30 වගේ වෙනකොට කොටුවෙන් බැහැල රෝද තුනක නැගල ගෙදර ගියා. කාලා නිදාගත්තු පාර අද හවස 4.00 වෙනකන් හිතේ හැටියට නිදා ගත්තා.
මේ දාලා තියෙන්නෙ නුවර පැත්තෙ මලක් එහෙම නෙවෙයි මේ අපේ වත්තෙ පිපුණු එකක්. කියන්නෙ නම් ගොඩ මානෙල් කියලා. ලස්සන වගේම තමයි සුවදත්.

නිමා නොවුනු පෙම් හැගුම්

2009-03-26T16:17:00.002+05:30

බසයක හමුවී නෙතගින් කරපු කතා
වදන් වෙලා ඇසුමට ටික කලක් ගියා
ආඩම්බර කමට මුලදී බැහැ කියලා
හා කියන්නෙ නැතුවම නුඹ කැමති උනා

බස් නැවතුමේ පෙම් මුළු වල කරපු කතා
පාළු මාවතේ නැවතී කියපු කතා
මල් වතු වල තුරු ගොමුවේ එතුනු ලතා
වල්මත් උනා නුඹෙ ආලය ගැනම සිතා

දැනගෙන නුඹේ මුල් පෙම මේ නොවන වග
පැතුවෙමි නුඹේ අවසන්‍ පෙම මා වෙන්න
මගෙ මුල් පෙමට බැරිවුනි නුඹ නවතන්න
පවස නුඹේ හැකි කාටද සංසිදලන්න

අවසන් සැදෑවට ආවේ නුඹ සමුගන්න
කීවෙනි පෙම්වතා සමගද පවසන්න
එනමුත් නොහැක නුඹ මතකය ගිණිලන්න
නුඹ එනතුරු ලතවෙමි විත් සනසන්න

Widows 7 සහ Virtual Hard Disk

2009-03-25T21:24:00.009+05:30

ඔන්න ඉතින් පරිගනකයට අත තියපු දවසෙ ඉදල වින්ඩෝස් හොරට පාවිච්චි කරපු මාත් දැන් Genuine වින්ඩෝස් පරිශීලකයෙක්. ඒත් ඉතින් මේකත් නොමිලෙ දීපු නිසා තමයි. අගෝස්තු වෙනකම් හොරෙක් නොවී වින්ඩෝස් පාවිච්චි කලහැකි. ඇත්තටම මේක කලින් ආපු සංස්කරණ වලට වඩා හුගක් ජනප්‍රිය වෙයි කියල හිතෙනව. මේක ඒ තරමටම සිම්පල්. ඒ වගේම පද්ධතියෙ ස්ථාවරත්වය හා ආරක්ෂාව අතිනුත් ඉදිරියෙන් තියෙනව. මේ මම අහු මුළු වල රිංගන කොට අහුවුන windows 7 වල පමණක් තියෙන අංගයක්.

ඒ තමයි VHD ඒ කියන්නෙ virtual hard disk ගොනු මේකෙදි local hard disk එකක් විදියට පාවිච්චි කරන්න පුලුවන් වීම. (ඉස්සර නම් virtual machine එකක්ම ඕනනෙ මේ වැඩේට). හරිම සිම්පල්. කරන්න තියෙන්නෙ මේ රූප සටහන් වල විදියට disk management එකට ගිහින් add vhd කියන සබැදුම තෝරල එතනින් virtual hard disk ගොනුව විවෘත කර දීම විතරයි. ආපහු අයින් කරන්න නම් detach vhd කියල තෝරන එක විතරයි. ඒ විතරක් නෙවෙයි වෙනත් virtual machine එකක පාවිච්චියට ගන්න පුලුවන් විදිහට virtual hard disk නිර්මාණය කරන්නත් මෙමගින් පුලුවන්.

1 open disk management – right click and select attach vhd

2 show the path to your vhd

සමාධි

2009-03-19T12:51:00.005+05:30

කාලෙකට පස්සෙ පොතක් කියෙව්ව. පොතේ නම සමාධි. ලියල තියෙන්නෙ එඩ්වඩ් මල්ලවආරච්චි. පෙරේත කමට එක හුස්මටම කියවල දැම්ම. කතාව ටිකක් විතර බොලදයි. ඒත් හොදයි. ජීවිතේට ටිකක් සමීප බවක් දැනුන. මේකෙ මගෙ හිතට වැදුනම කොටස තිබුනෙ පසු පිටේ (පින්තූරෙ නෙවෙයි සටහන)

.
ඇයි කියල දන්න අය දන්නවා. ඒ අතරෙ ඒකෙන්ම මගෙ යාළුවෙකුටත් උත්තරයක් දෙන්න හිතුනා.
මම නිකම් ඉන්න ගමන් මගෙ නම ගූගල්ට දාලා බැලුවා මෙන්න ආපු එක ප්‍රතිඵලයක්

ඇත්තටම මෙක දාපු කෙනා මගෙ ලගම යාලුවෙක් වෙන්න ඕන. මොකද ඒකට දාලා තියෙන විද්‍යුත් ලිපිනය දන්න අය ඉන්නෙ කීපදෙනයි. මගෙ නලලෙ තියෙන හම්ප් එකවත් මම බල්ලන්ට පූසන්ට කැමති එකවත් ආදරය කරන්න බාධාවක් නෙවෙයි. උඹ මේක දැම්මට තවම කව්රුවත්ම මාව බයිට් එකට ගත්තෙ නෑ. මොකද මේව බලන උන් උඹ වගේ සීනි බෝග ලෝකෙවල ජීවත් නොවෙන නිසා. මම මෙහෙම ඉන්නෙ ඇයි කියන එක උඹලා සේරම වගේ දන්නවා. මතක නැත්නම් මම මුලින් කියපු පොතේ පිට කවරෙ තියෙන සටහන කියවපං. එතකොට මතක් වෙයි. මොනා උනත් ගොඩාක් ස්තූතියි මට ප්‍රසිද්ධියක් අරන් දෙන්න වෑයම් කලාට. යාලුවෙක් වගේ ඉදන් මෙහෙම ‍පෙ_ _ _ වැඩ කරන්නෙ නැතුව පුලුවන්නම් පිරිමියෙක් වගේ ඇවිත් මට ගහල බලපන්.

මොහොතක් සැගවෙමු ලොවින් මුවාවී .....

2009-03-17T10:36:00.002+05:30

මට ලගදි, කුලරත්න ආරියවංශයන් රචනා කරපු ගීත එකතුවක් ලැබුනා. මේ ඒකෙ කිබුනු මගේ හිතට වැදුනු එක් ගීයක්.ගායනා කරන්නෙ නම් කව්ද කියල හරියටම දන්නෙ නෑ. ඒත් මේක මාව අතීතයට අරන් ගියා ඒකයි ලියන්න හිතුනෙ. ආදරය කරන කාලෙදි කාටවත් නොපෙනෙන්න අපි දරන උත්සාහය ඇත්තටම සාර්ථක උත්සාහයක් නෙවෙයි. කව්රුම හරි දකිනවනෙ. මේ ගීතයෙනුත් කියවෙන්නෙ පෙම්වතුන් යුවලකගෙ ඒ වගේ අහිංසක පැතුමක් ගැන.

ජීවිතෙන් දවසක්

2009-03-14T21:57:00.005+05:30

කාලෙකට පස්සෙ අද මට හිතේ හැටියට දවස ගෙවල දැම්ම. හැම සති අන්තයකම රගපාන්න වෙන මාමාගේ චරිතෙ අද ඕන වුනේ නෑ. අද අක්කල ආවෙ නෑ. මේ දවස් වල ගේ කඩාගෙන අලුත්වැඩියා කරන නිසා දූවිලි නාගෙන තමයි ඉන්නෙ. අද ටිකක් දූවිලි ඇවිස්සෙන වැඩ තිබුන නිසා අක්කලට එන්න එපා කිව්ව. පොඩ්ඩො දෙන්න අසනීප වෙයි කියල. ඒත් ටිකක් විතර දෙන්න නැති පාලුව දැනුනා. හවස අක්කගෙ පුතා කතා කරල අඩනව මෙහෙ එන්න ඕන කියලා. මොනවා කරන්නද පොඩි අයට තේරෙන්නෙ නෑනෙ. ඉතින් බැරිම තැන මම හෙට එයාව බලන්න එනව කියල පොරොන්දු උනාම තමයි ඇඩිල්ල නැවතුනෙ. දුව මේ ලගදි දවසක තමයි මුලින්ම මාමා කියල කතා කලේ. එවෙලෙ නම් හරි ආස හිතුන. දැන් ඉතින් හැමදාම සති අන්තය ගෙවෙන්නෙ ගොඩක් වෙලාවට ඒ දෙන්නත් එක්ක. ඉතින් මට ඕන විදියට දවල්ට ටිකක් නිදාගන්න, රූපවාහිනිය බලන්න ලැබෙන්නෙ නෑ. අද නම් හිතේ හැටියට ඒ දෙකම කලා.
හවස ගියා ජයවර්ධනපුර රෝහලට. යාලුවෙක්ගෙ තාත්තව බලන්න. වකුගඩු අමාරුවකට රෝහල් ගත කරල. ශරීරයට අවශ්‍ය ප්‍රමාණයට වඩා අඩුවෙන් වතුර බීම තමයි ලෙඩේට හේතුව. මාත් වැඩිය වතුර නොබොන නිසා මටත් ටිකක් බය හිතුනා. මීට පස්සෙ ටිකක් වැඩිපුර වතුර බොන්න හිතා ගත්ත. අපි වැඩිය නොහිතුවාට වතුර ටිකක් වැඩිපුර බීම ශරීර සෞඛ්‍යට හොදයි.
ආපහු ගෙදර එනකොට යාළුවෙක් මුණගැහුනා. මිනිහා ටිකක් කලකිරීමෙන් තමයි කතා කලේ. ටිකක් කතා කරගෙන යනකොට තමයි එයාගෙ ප්‍රශ්නෙ කිව්වෙ. එයයි බිරිදයි අතරට තුන්වෙනියෙක් ඇවිත්. නමුත් කතාව සම්පූර්ණයෙන්ම ඇහුවාම මට තේරුන දේ තමයි මේ පුද්ගලයාව යාළුවගෙ බිරිද ආශ්‍රය කරල තියෙන්නෙ යාළුවෙක් කියල හිතාගෙන. මිනිහාගේ හිතේ තිබුනු කැත අදහස දැනගෙන ඉදලා නැහැ. නමුත් ඔහු ඇයට තර්ජනය කරලා තියෙනව ඔහුට ඕන නම් ඇයයි සැමියයි වෙන් කරන්න පුලුවන් කියල. කිව්ව වගේම ඔහු මගෙ යාළුවගෙ හිතේ ඇය ගැන සැකයක් ඇති කරවලා. දැන් දෙන්න දෙතැනක. සැකය කියන්නෙ මහා භයානක දෙයක්. මේ දෙන්න බදින්න කලින් අවුරුදු 8ක් විතර ආදරය කලා. මොහොතකට උපදින සැකයකට අවුරුදු ගානක ආදරය අමතක කරන්න පුළුවන් නම්............ !

ආදරය සහ තනිකම

2009-03-12T17:12:00.004+05:30

විඳින්න

රාජ උදහසින් ගැලවෙන්නට කල අරුම පුදුම කාව්‍යයය

2009-03-09T16:05:00.000+05:30

මේ කියන්නට යන්නේ ඔබටත් මටත් හුරු පුරුදු සාමාන්‍ය ගණයේ කවියක් ගැන නම් නොවේ.මේ කවියේ විශේෂත්වය වන්නේ කවි තුනකින් කවි දොළහක් කියවිය හැකි අපූර්ව නිර්මාණයක් මේ කවිය තුල ගැබ්ව තිබීමයි.අදත් පුරාණ විහාරයක දොර පත්තක දක්නට ලැබෙන “බාරස කාව්‍යය” නම් මේ කාව්‍යයය පිටුපස ඇත්තේ රසවත් කතාවකි.
මේ අති දුෂ්කර ප්‍රහේළිකාමය කාව්‍ය බන්ධනය නිසාම එහි රචකයා වන කරතොට කීර්ති ශ්‍රී ධර්මාරාම හිමියෝ අක්කර දහතුන් දහසකට අධික පල්ලේබැද්ද ගම්වරය ඇතුළු රාජ්‍ය වරප්‍රසාද රැසක්ම ලබාගත්හ.
මේ කවේ ඇති විශේෂත්වය වන්නේ මෙම කවි තුන වමේ සිට දකුණටද , දකුණේ සිට වමටද, ඉහල සිට පහලටද, පහල සිට ඉහලටද කියවිය හැකි වීමයි. ඒ සෑම අවස්ථාවකදීම විශේෂණ පද රැසක් මගින් බුදුන් වහන්සේගේ ගුණ වර්ණනා කරමින් භුද්ධාභිවන්දනයක යෙදේ. පුදුමය නම් ඉදිරියට කියවාගෙන ගිය ගොණුවක් ආපසු කියවන විටදී වෙනත් තේරුමක් ගෙන දෙන සේ සකස් කර තිබීමයි.
කරතොට නම් ග්‍රාමය පිහිටා ඇත්තේ මාතර දිස්ත්‍රික්කයේ හක්මන - බෙලිඅත්ත මාර්ගයෙන් හැරී මද දුරක් ගිය විටය. ධර්මාරාම හිමියන්ගේ පියා දොන් දාවිත් විජේසිංහ නම් විය. මව බාල එතනා අබේසුන්දර සමරකෝන් විය. 1735 දී උපන් ධර්මාරාම හිමි , හේරගම්පිට විහාරාධිපති කදුරුපොකුණේ ස්වර්ණජෝති හිමිගේ ආචාර්යත්වයෙන් පැවිදි විය. අනතුරුව වැලිවිට අසරණ සරණ සරණංකර හිමි වෙතින් ධර්ම ශාස්ත්‍රය ඉගෙනීම පිණිස මහනුවර මල්වතු විහාරයට වැඩම කොට එවකට පැවති සියලුම උගතමනා ශිල්පයන් හදාරා අග්‍රගණ්‍ය පඩි රුවනක් බවට පත්විය.
1783 දී ධර්මාරාම හිමියනට ශ්‍රී පාදස්ථානයේ නායක පදවියද, පහතරට සංඝනායක පදවියද ශ්‍රී පාද අඩවියට අයත් වේහැල්ලේ තඹ සන්නස සහ ඇත්දළ ජෝඩුව ද රාජසිංහ රජු විසින් පිරිනමා තිබුණු බව සදහන් වේ.
ඊට වසර දෙකකට පසු 1785 දී යම් හේතුවක් නිසා රාජ උදහසට ලක්වීමෙන් කරතොට නාහිමියන් සිර අඩස්සියට පත්ව කටුගස්තොට ප්‍රදේශයේ අප්‍රසිද්ධ දිවියක් ගත කරන ලදී. හිස රැවුල්කැපීමටද තහනම් කරනු ලැබූ උන් වහන්සේ දැඩි මානසික පීඩනයකට ලක්ව සිටියහ.
එවකට මල්වතු විහාරයේ නැවතී සිටිමින් ධර්ම ශ්‍රාස්ත්‍ර ඉගැන්වූ අත්තරගම බණ්ඩාර මැතිතුමාද කරතොට හිමියන්ගේ ධර්මාචාර්ය වරයෙකි. කරතොට හිමිගේ වටිනාකම දන්නා බැවින් මෙතුමා, කරතොට හිමියන් සිර අඩස්සියෙන් මුදවාලීමට විවිධ ක්‍රම සොයමින් සිටින අතරම සාහිත්‍ය ලෝලියකු වූ රාජාධිරාජසිංහ රජු පැහැදවීම සදහා වූ කාව්‍ය ප්‍රබන්ධයක් කලොත් එය රජුට ඉදිරිපත් කල හැකි යයි ධර්මාරාම හිමිට පණිවිඩයක් යැවීය. එම පණිවිඩය යවා කීප දිනකින් “බර කව ගබ සක” නම් වූ දුෂ්කර ප්‍රබන්ධය රජු අතට පත්විය.
එවකට සිටි කිසිම ගිහි පැවිදි පඩිවරයෙකුට එකී ප්‍රබන්ධය කියවීමටවත් තේරුම් කරදීමටවත් නොහැකි වූ බැවින් රජතුමා කරතොට නාහිමියන් රාජ සභාවට කැදවාගෙන එන ලෙස ඇමතිවරයකු යැවීය
රාජ සභාවට පැමිණි නාහිමියෝ තම කෘතියේ ඇති කවි තුනෙන් කවි දොළසක් කියවා ඒවායේ අරුත් වන මුනි ගුණ වැනුම වටහා දුන්හ.
කරතොට හිමිගේ නිර්මාණ ශක්තියට හා පාණ්ඩිත්වයට අතිශයින් පැහැදුණු රජතුමා නාහිමියන් හිරෙන් මුදවා පල්ලේබැද්ද නින්දගම හා ශ්‍රී සංඛපාල විහාරයද තුඩපතකින් සහ සන්නසකින් 1786 දී පුජා කරන ලදී.

උපුටා ගැනීම - ඇඹිලිපිටියේ ඩේවිඩ් බමුණුගම නම් කෙනෙකු සිංහලයා වෙබ් අඩවියට ලියු ලිපියක් ඇසුරින් සහ පෞද්ගලිකව දන්නා තොරතුරු ඇසුරිනි.

මගේ මුල්ම වීඩියෝ සංවාදය

2009-03-03T09:41:00.003+05:30

මම මුලින්ම පරිගනක ක්ෂ්‍රේත්‍රයට ආවෙ පරිගනක උපදේශකයෙක් විධියට. ඒ මීට අවුරුදු 10ට කලින්. ඉතින් එතන කැඩුනු පරිගනක අලුත්වැඩියා කරනව බලාගෙන ඉදල ගෙදර ගිහින් හොදට වැඩකරමින් තිබුන අලුත්ම පරිගනකය මස් කලා. ඊට පස්සෙ ‍ෙෆා්මැට් කලා. දෙතුන් පාරක්ම කරන්න වුනා හරියට කරගන්න. ඊට පස්සෙ වැඩ කරපු ආයතනයෙ කැඩෙන පරිගනක හදන්න පුරුදු උනා.
ඔහොම ඉන්නකොට දවසක් ලොක්කා ඇවිත් කිව්වා අපි අලුත් ශාඛාවක් පටන් ගන්නවා. එදාට එහෙ සිද්ධ වෙන දේවල් ප්‍රධාන කාර්යාලයෙ අයට සජීවීව බලාගන්න සූදානම් කරන්න කියලා. එතකොට ADSL ගැන අහලවත් තිබුනෙ නෑ (2000) . තිබුනෙ Dial Up විතරයි. කරන විධිය දන්නෙ නැති උනාට අපේ කණ්ඩායම (නාමල් සර්, රුවන්, මම) ලොක්කට හා සර් කියල නාන්න බාල්දිය ඉල්ල ගත්ත. ලොක්කත් අවශ්‍ය කරන වෙබ් කැමරා, මයික්‍රෆෝන් ආදිය සපයල දුන්න.
ඔන්න ඉතින් දවසක් රෑ කට්ටිය පරීක්ෂණ විකාශයක් කරන්න සෙට් උනා අන්තර්ජාලය හරහා. ඒත් සාර්ථක නෑ. ඉතින් ඒක අතෑරල දාල ගෙදර ගියා. පහුවදා නාමල් සර් හොයාගෙන ආවා මරු මෘදුකාංගයක් Video Link කියල. ඒක අන්තර්ජාලය නැතිව කෙලින්ම දුරකථන දෙකක් හරහා වීඩියෝ සංවාද කරන්න පුලුවන් එකක්. අවශ්‍ය වෙන්නෙ මොඩම සහිත පරිගනක දෙකක් , දුරකථන සබදතා දෙකක් සහ වෙබ් කැමරා දෙකක් පමණයි. ඒක ස්ථාපනය කරලා බැලුවා වැඩේ නම් ගොඩ. ඒත් වීඩියෝ On කලාම කටහඩ ඇහෙන්නෙ කැඩි කැඩී.
ඒකටත් පොඩි හොර වැඩක් කලා. දෙපැත්තෙ පරිගණක දෙක SLT දුරකථන දෙකකට සම්බන්ධ කරලා ඒක රූප විකාශනය කරන්න විතරක් පාවිච්චි කලා. කටහඩ සදහා තව ජංගම දුරකථන දෙකක් යොදාගත්ත. ඒ දෙකේම මයික් ලයින් වලට පිටින් සාමාන්‍ය මයික් දෙකකුත් ස්පීකර දෙකට ඇම්ප්ලිෆයර් දෙකකුත් සම්බන්ද කලා. වැඩේ ගොඩ. නමුත් මුල්ම අවස්ථාවෙ එච්චර සාර්ථක උනේ නෑ. ඒ නුවර සහ කොළඹ. නුවර දුරකථන සබදතාවයෙ වේගයෙ අවුලක් නිසා. නමුත් ඊට පස්සෙ මේ විධියටම මාතර, ගම්පහ සහ කුරුණැගල සිට කොළඹ ප්‍රධාන කාර්යාලය සමග කිසි අවුලක් නැතුව සම්බන්ද උනා. දැන් ඒව මතක් වෙනකොට විලිලැජ්ජාවෙ සන්තෝසෙ බෑ.

Future is IT

2009-02-28T19:25:00.005+05:30

ඔන්න 2009 වසර තොරතුරු තාක්ෂණ වසර ලෙස නම් කරපු ආණ්ඩුව වැඩ පටන් ගෙන. මේක අ‍පිට හොද ආරංචියක්. ඔබත් පහත සදහන් යම්කිසි පාඨමාලාවක් හදාරන්නෙක් නම් ඒවායේ විභාග වෙනුවෙන් ගෙවන මුදල් $60 ක උපරිමයක් දක්වා රජය මගින් ආපසු ගෙවනවා.

Oracle Certifications
Cisco Certifications
Mirosoft Certifications
Sun Java Certifications & SUN server Certifications
IBM Certifications
NetApp Certifications
Juniper Certifications
Checkpoint Certifications
BlueCoat Certifications
PMP Certification
CISSP Certification

සාමාන්‍යයෙන් අපිට ගෙවන්න වෙන විභාග ගාස්තු සමග සංසන්දනය කරන කොට මේක සුළු ගානක් උනාට මේක හොද ආරම්භයක් කියලයි මට හිතෙන්නෙ.මේක ICTA එකේ තවත් ව්‍යාපෘතියක්. වැඩි විස්තර මෙතනින්.

මගේ හිත

2009-02-27T14:44:00.002+05:30

අහලම බලන්න

Globe7 - තවත් Soft Phone එකක්

2009-02-26T14:30:00.003+05:30

මේ තවත් Soft Phone එකක්. ඒ කියන්නෙ Skype වගේ පරිගනකයේ ඉදන් ලෝකයේ ඕනම තැනකට කතා කරන්න පුලුවන් මෘදුකාංගයක්. නමුත් Skype වගේ බොහොමයක් Soft Phone වලින් පරිගනකයකට හැර දුරකතනයකට අමතන්න නම් මුදල් ගෙවන්න වෙනවා. ඒත් Globe7 අපිට සල්ලි දෙනවා කතා කරන්න (ලංකා බෙල් වගේ). ලියාපදිංචි වෙනකොටම 1$ ක් ලැබෙනව. ඔබ හදුනන අයව මීට සම්බන්ධ කරවීමෙන් සහ Globe7 මගින් පවත්වාගෙන යන නොයෙකුත් අනුග්‍රාහක වැඩසටහන් වලට සම්බන්ධ වීමෙන් ඔබට කතාකිරීමට Credit එකතු කරගන්න පුලුවන්.

මෙතනින් බාගන්න පුලුවන්.

ඒකත් හරිම සිම්පල් theme එකක්

2009-02-25T12:55:00.003+05:30

ඔන්න ඉතින් මාත් අලුත් theme එකකට මාරු උනා. ඒකත් හරිම සිම්පල් theme එකක්. ඇයි අපි blogger එකෙන් දෙන ආකෘති වලටම හිර වෙලා ඉන්නෙ. මට මුල ඉදලම මේ දේ කරන්න උවමනාව තිබුනට ඊයෙ පෙරේදා තමයි හිතට අල්ලන theme එකක් ලැබුනෙ. උදව් කලේ Google. සංසදේ අය ලියපු සමහර ලිපිත් යම්තාක් දුරකට සහාය වුනා.

ඒ අස්සෙ ‍ෛ‍වරස් එකක් ඇවිත් මාර වදයක් දුන්නෙ. Hard disk එකේ තියෙන ඔක්කොම Folder .scr කියල extension එක මාරු වෙනව. ඉතින් ඊට පස්සේ සොරිම තමයි. හොද වෙලාවට backup එකක් තිබුනු නිසා ලේසිම ක්‍රමය (FRI Method)*එක අනුගමනය කරලා වැඩේ ගොඩ දා ගත්තා.

* FRI – format re install

කොම්පියුටරේ රත් වෙනවා වැඩිද?

2009-02-18T14:35:00.005+05:30

සිසිල් කිරීමට අවශ්‍ය ද්‍රව්‍ය

Eclipse System 6-Gallon Aquarium Kit
Motherboard tray
Computer Hardware
Acrylic panel
Six gallons of mineral oil

මේ බඩු ලැයිස්තුවත් සූදානම් කරගෙන මේ වීඩියෝ එක බලන්න.

දෛවය මෙය නම් සුදු නුඹ නාඩන්

2009-02-14T22:25:00.002+05:30

ලස්සන ගල් දෙකක්

2009-02-11T14:46:00.005+05:30

මේ දෙක ගෙනාවෙ මම සේවය කරන ආයතනයට ගල් සපයන තැරැව් කරුවෙක්. මේක දුර්ලභ නිසයි බ්ලොග් එකේ දාන්න හිතුවෙ. සාමාන්‍යයෙන් මැණික් වෙලදපොලේ නිශ්චිත මිලක් නැති ගල් අතරට වැටෙන ගලක්. විශේෂත්වය තමයි මේ පාෂාණය නිර්මාණය වීමේදී අවට තිබුනු කුඩා ශාඛ වැනි දෑ ඒ තුලට අවශෝෂණය කරගෙන තිබීම. වටිනාකම තක්සේරු කිරීම අපහසු වීමට ප්‍රධානම හේතුව තමයි ලෝකයේ තවත් මෙවැනි ගල් තිබුනත් අභ්‍යන්තරයේ විහිදී ඇති මෝස්තරය ඇත්තේ මෙහි පමණක් වීම.

යමක් හොදින් වටහා ගැනීමට නම් අප එහි කොටසක් විය යුතුයි

2009-01-31T21:25:00.003+05:30

මේ මට බලන්න ලැබුනු හොදම විද්‍යා ප්‍රබන්ධ චිත්‍රපටි වලින් එකක්. චිත්‍රපටියෙ අවසානයට කිට්ටු වෙන තෙක්ම කතාව තේරුම් ගන්න අමාරුයි. ඒ උනාට ප්‍රෙක්ෂකයින්ව කුතුහලය සහිතව අවසානය තෙක් කතාවට බැද තබා ගන්න අධ්‍යක්ෂක වරයා සමත් වෙලා තියෙනවා.

මේකෙ ප්‍රධාන චරිතය කතාවෙ හැටියට ලොව හොදම ඉංජිනේරුවෙක්. ඔහුව යම් කිසි කන්ඩායමක් විසින් ඔවුන්ගේ ව්‍යාපෘතියක් සදහා බදවා ගන්නවා. මට තේරුන විදිහට ඊට පසු අවුරුදු තුනක්ම ඔහු ජීවත් වෙන්නෙ අනාගතයෙ. ව්‍යාපෘතිය සම්පූර්ණ කරලා ඔහු එලියට එන්නෙ මතකය මකා දමන ලද්දෙක් හැටියට. ඉන් පසු ඔහු තමන් වෙත ලැබෙන උපාංග 19 ක් සහිත පාර්සලයක් උපයෝගී කර ගනිමින් තමන්ව ඝාතනය කිරීමට එන අර මුලින් කී කණ්ඩායමෙන් ජීවිතය ගලවා ගන්නා ආරයත් සමග තමයි කතාව ගලාගෙන යන්නෙ. හරිම තාත්වික විදියට කරපු නිර්මාණයක්. චිත්‍රපටයෙ නම තමයි PAYCHECK. මේ trailer එක බලන්න එතකොට තේරෙයි මම කියන්නෙ බොරු නෙමේ කියලා.

80 වැනි සුලෝහිත මහා සංග්‍රාමය

2009-01-30T11:21:00.005+05:30

කොළඹ ආනන්ද සහ නාලන්දා විද්‍යාල අතර වාර්ෂිකව පැවැත්වෙන මහා ක්‍රිකට් තරගය මේ අවුරුද්දෙත් මාර්තු 7 සහ 8 දෙදින තුල SSC එකේදි තියෙනවා. මේ කලින්ම දැනුම් දෙන්නෙ දවස් දෙක ඒ සදහා වෙන් කර ගන්නයි. මොකද කවුරුත් දන්න විදියට අපිට ආයෙත් පාසැල් කාලෙට යන්න පුලුවන් එදාට. කාලෙකින් නොදැකපු සහෘදයො එක්ක fun එකක් ගන්න එදාට සෙට් වෙමු

බ්ලොග් එකේ නම දාපු හැටි

2009-01-30T10:35:00.008+05:30

මගේ බ්ලොග් එකේ නම දාන්න මුල් වුනු සිංදුව තමයි මේ. මුලින්ම මම දාපු නම තමයි “මම දකින විශ්වය”. ඒත් ඒක දැම්මාම මාව නිකන් දාර්ශනිකයෙක් (පොරක්) වගේ පේන්න ගත්තා මටම. ඉතින් වෙන නමක් ගැන දහ අතේ කල්පනා කරන කොට නිකම්ම වගේ මේ සිංදුව තොල් අතරෙ මිමිණෙන්න ගත්තා. එහෙම තමයි මේ බ්ලොග් එකේ නම හැදුනෙ.

මේක ගායනා කරන්නෙ සනත් නන්දසිරි. ඔහුගෙ කටහඩ නිසා මේ සිංදුවෙ තියෙන දුක්බර බව ඉතාම හොදින් හිතට දැනෙනවා. විමල් ජයශාන්ත නමැති මේ ගීතයෙ රචකයාට ගීතයට ගැලපෙනම කටහඩ ලැබිලා තියෙනවා. සංගීතයත් ගායකයාගෙන්මයි.

එදා මෙදා තුර කදුලට විවරවු - දෑස් පියන් පත් කවුලු වසා
ලයේ ගලා ගිය සෙනේහයේ සුව - සිනා පිරුනු රත් දෙතොල පියා
මිලාන වී ගිය රෝස කුසුම් පෙති - කම්මුල් සුදුමැලි පාට හොවා
දෑත ලයේ බැදි අවසන් ගමනට - සොදුරිය මට නොකියාම ගියා

දෑස් කවුලු පත් පලා කදුලු කැට - වෑහෙද්දී මගෙ දෑස් අගින්
කාත් කවුරුවත් ඇතත් හිතයි මට - පාත් වෙන්න ඔය මුවට උඩින්
ඈත්ව යන්නට සමුගෙන කවුරුත් - ඔබ මුව දොවතත් සුවද පැනින්
මාත් මගේ හිතටත් ඔබ සුවදයි - ඈත් නොවේමැයි ඒ සුවදින්

ඊයේ ඉපදී අද මියයන්නට - පෙරුම් පුරාගෙන උපන් ලයේ
හීයේ වේගෙන් අහස උසට බැදි - ආදර ලෝකය හෙටත් තියේ
ඒත් ඉතින් දැන් සොදුරියෙ ඔබ නැත - ඇයි මේ ලොව මා තනිව ගියේ
ආයේ දවසක එක හිත් ඇත්තන් - වී අපි ඉපදෙමු එකට ප්‍රියේ

Windows දෘඩාංග ධාවක ගොනු (Driver Files) සුරකින ක්‍රමයක්

2009-01-27T09:46:00.001+05:30

පරිගනක කාර්මිකයින් බොහෝ විට මුහුන දෙන ප්‍රශ්නයක් තමයි තමන්ට අලුත්වැඩියාව සදහා ලැබෙන පරිගනක සමග ඒවායේ Driver CD නොලැබීම. මේ වෙලාවට එක්කෝ කාගෙන් හරි අදාල ගොනුව ඉල්ලා ගන්න වෙනවා නැත්නම් අන්තර්ජාලයෙන් බාගන්න වෙනවා. ඒත් එහෙම හොයාගන්න ඒවත් සමහරවිට 100% ක්ම ගැලපෙන්නෙ නැති වෙන්න පුලුවන්. අදාල පරිගනකයේ ස්ථාපනය කරලා තියෙන ධාවක ගොනු ටිකම Backup කර ගන්න ක්‍රමයක් තියෙනව නම් මරු නේද? ඔන්න ක්‍රමයක් තියෙනවා.
DriverMax කියන මෘදුකාංගය බාගත කරලා අදාල පරිගනකයේ ස්ථාපනය කරගත්තාම අපිට අවශ්‍යය සියලුම ධාවක ගොනු අපිට අවශ්‍යය තැනකට Export කර ගන්න පුලුවන් අවශ්‍යය විටක නැවත ස්ථාපනය කර ගැනීම සදහා. බය වෙන්න දෙයක් නෑ මේක නොමිලේ බෙදාහරින එකක්. පරිගනකයට හානියකුත් නැහැ.හැබැයි මේක කරන්න ඕන FRI ක්‍රමය අනුගමනය කරන්න කලින්. මේ අඩවියෙ තව ඔය වගේ මෘදුකාංග ගොඩක් තියෙනවා. මම තාම පාව්ච්චි කලේ මේක විතරයි. ට්‍රයි කොරල බලන්ඩ.මේකෙ පින්තූර ටිකක් මෙතනින් බලන්න පුලුවන්

සිතින් විතරක් පෙම් කරන්නම්

2009-01-25T21:34:00.003+05:30

සිත සවි වී නම් සිතැගි කියන්නට
මා සතු වේ ඔබ දිවිය පුරාවට
අපේ මතකයන් අමතක නොවනට
නිධන් කරමි ඒ කාලය සදහට

ඉරණම එලෙසම ගලා ගියාදෙන්
දෙදෙනම දන්නා සත්‍යයය එයනම්
මගේ හැගුම් මා සිරකර ගන්නම්
සිත් ගත් සොදුරිය නොකර තිගැස්සුම්

කාලය සමගින් දිවිය ගලන විට
ආලය ඇත සිත සදාකාලයට
සිතුවිලි වී ඇත සගවා ගන්නට
අහිම් නිසා ඔබ මා ජීවිතයට

මගේම නෙත් යුග

2009-01-19T20:34:00.008+05:30

මේ සිංදුව මට ඊයෙ වුනු සිද්ධියක් නිසා තමයි මතකෙට ආවෙ. ගායනා කරන්නෙ සුනිල් එදිරිසිංහ. ලිව්වෙ කවුද කියලා නම් දන්නෙ නෑ. ඒත් ලියපු කෙනාටත් මට වගේ අද්දැකීමක් ඇති සමහර විට.

ඒ සිනාවමයි, ඒ කතාවමයි, ඒ මුහුණමයි, ඒ එයාමයි. නෑ ඒ එයා නෙවෙයි.

මගේම නෙතු යුග
අසරණ මා ඇයි
මේ ලෙස රිදවන්නේ...
මගේ සවන් යුග
තනිවූ මා සිත
ඇයිදෝ රිදවන්නේ..

යන එන මාවත
ගැවසෙන රූ මැද
ඇයගේ රුවම මවා..
මා රවටා හිනැහෙන්නට තරමට
නෙත් යුග කුරිරු වෙලා..

නිසසල හැම විට
සිහිනෙක විලසට
ඇයගේ හඩම මවා..
මා රවටා සැනසෙන්නට තරමට
දෙසවන් නපුරු වෙලා

වහාම ක්‍රියාත්මක වන පරිදි මහරගම නගරය, තම පදිංචිය වෙනස් කරයි

2009-01-16T10:42:00.006+05:30

මට මේක පෙන්නුවෙ මගෙ යාළුවෙක්. මහරගම පැත්තෙ පදිංචි අයට 12 වෙනිදගෙන් පස්සෙ වෙනසක් එහෙම තේරුනාද? හික්... හික්...... මේ කට්ටිය (AirTel) මහරගම ටවුම, ජා ඇල කිට්ටුවට අරන් ගිහින්.මාත් අද හවස මහරගම යන්න හිටියෙ. මේක දැක්කෙ හොද වෙලාවට නැත්නම් හයිලෙවල් පාරෙනෙ යන්නෙ. අනේ මන්දා. මේ ගොල්ලන්වත් යවන්න ඕන අර සිරසෙ පුංචි පහේ මං කියන වැඩසටහනට. අර රේඩියෝ එකේ ටී වී එකේ *මාත් AirTel වලට ගියා* කියලා කියවන කට්ටියට දෙයියන්ගෙම පිහිට තමයි.

AirTel ලංකාවෙ සිතියමත් වෙනස් කරයිද?

2009-01-15T21:08:00.002+05:30

අවුරුදු කීපයක ඉදලා AirTel එනවා කියලා අපේ සමහරු කෙකර ගෑවනෙ. ඒ කෙකර ගාලා දාපු බිත්තරේ තරම දැන් ටික ටික පේන්න අරගෙන. දුරකථන ගාස්තුත් සාපේක්ෂව අඩුයි වගේ පෙනුනට අන්තිම බිල අනික් ඒවාගේ ගානම වෙනවා. අනික මාර්තු 31 න් පස්සෙ ගාස්තු තවත් වැඩි වෙනවා. මම මේ ලියන්න ආවෙ AirTel ගාස්තු ගැන නම් නෙවෙයි. මේ සමාගමේ නොසැලකිලිමත් කම ගැන කතාවක්. මාත් AirTel නොගත්තට විස්තර ටිකක් බලන්න මේ ගොල්ලන්ගෙ වෙබ් අඩවියට ගියා. ඒකෙ සේවා මධ්‍යස්ථාන ලැයිස්තුවෙ රත්නපුර සේවා මධ්‍යස්ථානයෙ ලිපිනය දැක්කම තමයි මට බය හිතුනෙ AirTel ලංකාවෙ සිතියමත් වෙනස් කරයිද කියලා. මොකද ඒක තියෙන්නෙ ගාල්ලෙලු. මේ අයගෙ විස්තර පත්‍රිකා වලත් මේ වගේ දෝෂ ගොඩක් මම දැක්කා.
මට නම් හිතෙන විදිහට මේ වගේ දේවල් සුළු අතපසුවීම් කියල අතඅරින්න බෑ මේක මහා පරිමාණ සමාගමක් නිසා. මේ වගේ සුළු දෙයක් ගැනවත් සැලකිල්ලක් නොදක්වන සමාගමකින් ගුණාත්මක සේවාවක් මම නම් කොහෙත්ම බලාපොරොත්තු වෙන්නෙ නෑ. ඩයලොග් මට හොදයි.

Office 2007 ගොනු ඇරගන්න බැරිද ?

2009-01-13T11:57:00.001+05:30

මයික්‍රොසොෆ්ට් ආයතනයෙන් ඔෆිස් 2007 පැකේජය නිකුත් කිරීමත් සමගම, පැරණි වෙලුම් භාවිතා කල පිරිස පොඩි අමාරුවක වැටුනා. ඒ තමයි මෙතෙක් භාවිතා කරපු file extention සියල්ලම 2007 වලදි වෙනස් කරලා තිබීම ( doc -> docx , xls -> xlsx වගේ). ඔෆිස් 2007 ස්ථාපිත කරගන්න පුළුවන් මට්ටමේ පරිගනක පාවිච්චි කරපු සමහරක් නම් 2007 දාගත්ත. නමුත් 2007 වල අතුරු මුහුණතත් ගොඩක් වෙනස් නිසා වැඩි දෙනෙක් 2003 වලම රැදුනා. මාත් ඉන් එක්කෙනෙක්.
ඔෆිස් 2007 ගොණුවක් කවුරු හරි එව්වම ඒක ඇරගන්න බැරි නිසා ආපහු එවපු කෙනාටම කියලා පරණ Format එකට Save කරවා ගන්නවා. පරිගනක භාවිතය ගැන වැඩිය නොදන්න කෙනෙකුට නම් ඉතින් ග්‍රීක් තමයි මෙහෙම උනාම.
ඔන්න දැන් මයික්‍රොසොෆ්ට් එක ඒ ප්‍රශ්න ඔක්කොම විසදලා. නොමිලේ බාගත කරගන්න පුළුවන් 2007 / 2003 පරිවර්තකයක් දීලා තියෙනවා. ඔෆිස් 2003 පරිශීලකයන්ට ඒක මෙතනින් භාගත කරගෙන ස්ථාපනය කර ගත්තාම නිකම්ම 2007 ගොනුත් ඇර ගන්න පුළුවන්.

මාළු උකුණා

2009-01-07T13:07:00.009+05:30

මම මේ ලියන්නෙ උකුණන් විශේෂයක් ගැන. මිනිසුන්ට හැදෙන උකුණො නෙවෙයි මේ මාළුන්ට බෝවෙන උකුණො විශේෂයක් (Fish Lice). මම සුරතලේට ඇතිකරන රන් මස්සො (Gold Fish) ටිකට මේ ලෙඩේ හැදුනු නිසා අන්තර්ජාලයෙන් ඒ ගැන සොයාගත්ත විස්තර ටිකක් තමයි මේ කියන්න යන්නෙ. සුරතල් මාළු ඇති කරන කාටත් මේක වැදගත් වෙයි කියලා හිතුනු නිසා.

මේ උකුණා (Argulus) ඇත්තටම පරපෝෂිතයෙක්. උන් වැඩෙන්නෙ අපි ඇති කරන මාළුන්ගෙ ලේ උරා බීමෙනුයි. උන් ලේ උරා බීමේදි මාළුන්ගේ ශරීරය තුවාල වන නිසාත් එහිදී උකුණන් පිටකරන ශ්‍රාවයක් නිසා එම තුවාල සුව නොවන නිසාත් අවදානම දෙගුණ වෙනවා. මේක ඉතාම ලේසියෙන් සුව කරන්න පුළුවන් ආසාදනයක් උනත් නොදැනුවත්කම නිසා ගොඩාක් වෙලාවට වෙන්නෙ මාළු මැරිලා යන එක.

මට මේ ඇබැද්දිය උනේ දෙවෙනි පාරට. පලවෙනි සැ‍ෙර්දි නම් බෙහෙතක් හොයා ගන්න බැරි උනා. ඉතින් මම කලේ මාළුන්ව පරිස්සමට අල්ලලා tooth pick එකක් ආධාරයෙන් උකුණො ටික ගලවලා අයින් කරන එක. Angel වගේ මාළු මෙ උකූණන්ව ආහාරයට ගන්න නිසා ජෛව පාලන ක්‍රමයක් විදියට ඒක භාවිතා කරන්න පුලුවන්. මේ සැරේ නම් බෙහෙතක් හම්බඋනා. ඒත් පරන ක්‍රමේ ෂුවර් නිසා බෙහෙත් දාලත්, සත්තු ටික අතින් ගැලෙව්වා. මේ ගැන වැඩි විස්තර මෙතනින් බලා ගන්න පුලුවන්

බිල් ගේට්ස් ගේ නය ගෙවීමට ඉක්මන් ක්‍රමයක්

2009-01-04T09:53:00.016+05:30

ඇත්තටම Ububtu තමයි මම හිතන විදියට වින්ඩෝස් වලින් විවෘත කේත ලෝකයට පිවිසෙන්න තියෙන පහසුම මාර්ගය. මාත් කාලෙක ඉදන් වින්ඩෝස් වලින් ගැලවෙන්න ක්‍රමයක් හෙව්වට එක පාරටම වින්ඩෝස් වලින් ගැලවෙන්න බෑ. ටික ටික තමයි පුරුදු වෙන්න ඕන. ඉතින් වින්ඩෝස් මත උබුන්ටු ධාවනය කරන්න ක්‍රමයක් හෙව්වා. Microsoft virtual PC ලිනක්ස් සමග ක්‍රියාත්මක වෙන්නෙ නෑ. VMWare සහ Virtual Box කියන මෘදුකාංග දෙක ලිනක්ස් වලට සහයෝගය දැක්වූවත් Virtual Box තමයි නොමිලේ ලබා ගන්න හැකියාව තියෙන්නෙ.
මේ තියෙන්නෙ මම වින්ඩෝස් විස්ටා මත උබුන්ටු ධාවනය කරන අවස්ථා දෙකක්. Virtual Box වල තියෙන විශේෂ පහසුකමක් තමයි දෙවෙනි පින්තූරෙ තියෙන්නෙ.

ඒකට කියන්නෙ Seamless mode කියලා. Microsoft virtual PC සහ VMWare හි තියෙන Full Screen mode එක ව‍ගේ උනාට මේකෙදි අපේ වින්ඩෝස් මුහුනත හැංගෙන්නෙ නෑ. මරු , දෙකම එක විට පාවිච්ච් කරන්න පුලුවන්. ඒක නිසා දැන් Dual Boot ක්‍රමේට සමු දෙන්නත් පුලුවන්. මේ විදියටම ලිනක්ස් මත Virtual Box ස්ථාපනය කරලා ඒ මත වින්ඩෝස් නැත්නම් වෙනත් ඕනම මෙහෙයුම් පද්ධතියක් ධාවනය කරවන්න පුලුවන්. ඉක්මනටම මයික්‍රොසොෆ්ට් එකට නය ගෙවන එක නවත්වා ගන්නත් පුලුවන් මේ විදියට වින්ඩෝස් මත හිදගෙනම වෙනත් මෙහෙයුම් පද්ධතියකට හුරු උනාම.

නව වසරක් ......?

2008-12-31T13:00:00.003+05:30

මම ඉස්සෙල්ලාම ‍රස්සාවකට ගියෙ 1999 ජනවාරි 18 වෙනිදා ඒ පරිගනක උපදේශකයෙක් විදියට. ඊට පස්සෙ දෘඩාංක හා ජාලකරණය පැත්තට යොමු උනේ 2000 දි ව‍ෙග්. එතැන් ඉදන් අද වෙනකම් නව (9) වසරක් නොදැනිම ගෙවිලා ගිහින්. ආපස්සට හැරිලා බැලුවම ජයගත්ත අභයෝග වගේම වැරදුනු තැනුත් ගොඩක් තියෙනවා. විශේෂයෙන්ම මතක් තරන්න ඕන නාමල් සර්ව. එයා තමයි මාව මේ පාරට ඇදල දැම්මෙ කිව්වොත් හරි. ඒ වගේම එදා ඉදල අද වෙනකම් මං හිරවුනු වෙලාවට මාව ගලවා ගත්තු (ජොබ් එක බේරලා දුන්නු) රුවන්. තව මෙකී නොකී මට උදව් කරපු හැම කෙනෙක්වමත්. හැමදාම සහෝදරයො වගේ මගේ ලගින් හිටපු අතිජාත මිත්‍රයො හය දෙනා අමතක වෙනවා තව ටිකෙන් - (චරිත්, සුරංග, බන්දුල, හසිත, දනේෂ්, බිංදු)
මම දැන් කරන ජොබ් එක නම් මගෙ යාලුවො කියන විදියට මාර ආතල්. මොකද වැඩි හරියක් මම නිදාගන්න නිසා. පරිගනක පද්ධතිය යහතින් තියෙනකම් ඉතින් කම්මැලිකමට නිදා ගන්නවා නැත්නම් අලුත් මොනවා හරි ඉගෙන ගන්නවා. පරිගනක පද්ධතිය අවුල් වෙනව කියන්නෙ මට නම් මාර ආතල් එකක්, එතකොට මට කරන්න වැඩ තියෙනවනෙ. හික් හික්... හැබැයි ඉතින් මෙහෙ වැඩිය පණ්ඩිතයො නැති නිසා ඒ ආතල් එකත් ගන්නෙ බොහෝම කලාතුරකින් තමයි.
ඉතින් මම දවසක් ඔහොම නිදාගෙන හිටපු වෙලාවක අර මම කලින් කිව්ව රුවන් චැට් එකෙන් ලින්ක් එකක් එව්වා. ඒක ඇරලා බලන කොට සිංහලෙන්, ඩයලොග් පැකේජ ගැන ලියපු එකක්. මට මතක විදියට “මාලින්දගේ සටහන්”. ඒ පිටුවෙ තිබුනු තව ලින්ක් එකකින් සිංහල බ්ලොග් කියවනයට ගියා. ඔන්න ඔහොමයි මම මගේ බලොග් එක ලියන්න ගත්තෙ. දැන් නම් නිකන් ඉන්න වෙලාවට වැඩිපුර කරන්නෙ බ්ලොග් කියවන එක. (නිදා නොගන්නෙමත් නෑ).
ලබන අවුරුද්දෙදි කරන්න වැඩ ගොඩක් ඔලුවෙ තියෙනව හැමදාම වගේ. බලමු මොනාද වෙන්නෙ කියල නේද?

සුද්දා අපිට පුරුදු කරලා ගිය එක පුරුද්දක් තමයි ජනවාරි 1 වෙනිදට අවුරුදු කන එක. ඒකත් හැබැයි නරක නෑ. ඒත් අපේ සිංහල හින්දු අලුත් අවුරුද්ද ලබන්නෙ අප්‍රේල් 13 වෙනිදටනෙ.

අපිත් දැන් විශ්ව ගම්මානයෙ සාමාජිකයො නිසා සුද්දගෙ ක්‍රමේට අද සුභ පතන්නම්, ලබන්නා වූ 2009 අවුරැද්ද හැමෝටම ජය සතුට සාමය සපිරි සුභම සුභ අවුරැද්දක්ම වේවා කියලා....

ඔබ ගිහින් දුර ඈත

2008-12-28T08:21:00.009+05:30

හිමි නොමැති වග දැනගෙනත් මට
ලොබ බැදිමි ඔබ ඇසුර ලැබුමට

ගොසිනි ඔබ අද දුරක ඈතට
ගෙන දෙමින් වේදනා හදකට
අදත් පැණයක් ඉතිරි කරමින්
පිලිතුරක් කිසිදිනක නොලැබෙන
ආදරේ මුත් උනුන් හට අපි
කිමද සිතුනේ එක් නොවන්නට
පෙරුම් පුරමු අපි යලි හමුවන්නට
එක් වන්නට භවයක දී මතුයම්

මැරතන් දුවන හැමෝටම සුභ පැතුම්!

2008-12-26T22:18:00.004+05:30

කට්ටිය අද ඉදලම ලියන්න දේවල් ඉතුරු කරනවද කොහෙද. අද දවසම වේලි වේලි හිටියෙ කියවන්න දෙයක් නැතිව. ඒ අතරට කියවන්න මොනව හරි ලියපු ඔක්කෝටම පිං. ඒ අතරෙම අපේ කාලිංග සහෝදරයටත් සුභ පතන්න හිතුනා අර ප්‍රතිචාර ප්‍රමාණයට. ඇත්තටම ඒක ජයග්‍රහනයක්. මාත් ලෑස්ති වෙලා ඉන්නෙ හෙට මැරතන් දුවන්න නෙවෙයි බලන්න. ඔක්කොමලා ලියන්න ගියාම බලන්න අය නැති වෙනවනෙ නේද? මාත් පුලු පුලුවන් විදියට Comments දාන්නම්. එහෙනම් හෙට මැරතන් දුවන හැමෝටම සුභ පැතුම්!

හෙට දුවන්නෙ නැති හැමෝටම මාත් විවෘත ආරාධනාවක් කරනව මේ දුවන අයට හුරේ දාන්න එන්න කියලා. :)

ඔබේ වෙබ් අඩවියේ ඉතිහාසය බලන්න කැමතිද?

2008-12-24T09:40:00.003+05:30

සාමාන්‍යයෙන් අපේ වෙබ් අඩවියක් යාවත්කාලීන කලාට පස්සෙ ඉස්සර තිබුනු විදිය බලා ගන්න ඔන වුනොත් මොකද කරන්නෙ? Backup එකක් අරන් තිබුනෙ නැත්නම් අනාතයි නේද? දැන් නම් ඉතින් බය වෙන්න දෙයක් නෑ. http://www.archive.org/ කියන වෙබ් අඩවිය අපි වෙනුවෙන් නොමිලේම මේ සේවය සපයනවා. මේකේ විශේෂත්වය තමයි අපි නොදැනුවත්වම මේ දේ වෙන එක. මේ අඩවියට ගිහින් ඕනම ලිපිනයක් දීල බලන්න. ඕනම විබයක ආරම්භයෙ ඉදන් මේ දක්වා සියලුම අවස්ථා බලා ගන්න පුලුවන්.

Dogs with Blogs-- Do They Know It's Christmas?

2008-12-24T08:44:00.002+05:30

බලොග් ලියන කියවන හැමෝටම සුභ නත්තලක් වේවා.